2024 جىلدىڭ ءبىرىنشى قاڭتارىنان باستاپ پيلوتتىق جوبا اياسىندا 17 جاسار بالالاردى اسكەري ەسەپكە قويۋ اۆتوماتتى تۇردە جۇرگىزىلەدى.
قورعانىس ۆەدومستۆوسىنىڭ باستاماسىن پرەمەر-مينيستر، مۇددەلى مەملەكەتتىك ورگاندار، استانا، رەسپۋبليكالىق ماڭىزى بار قالالار مەن وبلىستاردىڭ اكىمدىكتەرى قولدادى، دەپ حابارلايدى Almaty-aksamy.kz.
قازاقپارات مالىمەتىنشە، ونى ىسكە اسىرۋ مەملەكەتتىك ورگانداردىڭ اقپاراتتىق جۇيەلەرىن موديفيكاسيالاۋ مەن ىقپالداستىرۋدىڭ ارقاسىندا مۇمكىن بولدى. بۇل ەلىمىزدىڭ 16-60 جاس ارالىعىنداعى ازاماتتارىن اسكەري ەسەپكە الۋدىڭ تولىق قامتىلىپ جۇرگىزىلۋىنە مۇمكىندىك بەردى.
قولدانىستاعى زاڭعا سايكەس جىل سايىن ون جەتى جاسقا تولاتىن ەر ازاماتتاردى تىركەۋ جۇرگىزىلەدى. مۇنداي پروسەدۋرا اسكەري قىزمەتكە جارامدىلىق دەڭگەيىن انىقتاي الادى.
«وسىعان بايلانىستى دەنساۋلىق ساقتاۋ ۇيىمدارى ءبىر ايلىق بالالاردان باستاپ 18 جاسقا دەيىنگى بالالاردى كەيىننەن ديناميكالىق باقىلاۋمەن جانە ساۋىقتىرۋمەن پروفيلاكتيكالىق مەديسينالىق تەكسەرۋلەردى جۇزەگە اسىرادى. بۇل رەتتە جالپى پراكتيكا دارىگەرلەرى بەيىندى مامانداردىڭ قورىتىندىسىن جانە زەرتحانالىق-دياگنوستيكالىق زەرتتەۋلەردى ەسكەرە وتىرىپ، 15 پەن 18 جاس ارالىعىندا بالالاردىڭ دەنساۋلىق جاعدايىنا كەشەندى باعالاۋ جۇرگىزەدى. مۇنداي دەرەكتەر قورعانىس مينيسترلىگىمەن بىرىكتىرىلگەن دەنساۋلىق ساقتاۋ مينيسترلىگىنىڭ اقپاراتتىق جۇيەسىندە كورسەتىلەدى»، - دەپ حابارلايدى قورعانىس مينيسترلىگىنەن.
جىل سايىن 120 مىڭعا جۋىق 17 جاسار بالا اسكەري ەسەپكە الىنادى. قىزمەتتى اۆتوماتتاندىرۋ شاقىرۋ ۋچاسكەلەرىنە تىركەۋدى ۇيىمداستىرۋ جانە جۇرگىزۋ ءۇشىن جەرگىلىكتى اتقارۋشى ورگاندارعا جىل سايىن بولىنەتىن ميلليارد تەڭگەدەن اسا بيۋدجەت قاراجاتىن ۇنەمدەۋگە مۇمكىندىك بەرەدى. ال ۇنەمدەلگەن قاراجات مەديسينالىق كوميسسيا مۇشەلەرىنە ەڭبەكاقى تولەۋ، شالعايداعى اۋىلدىق وكرۋگتەردەن جاستاردى اسكەري كوميسسارياتتارعا الدىرۋ، كەڭسە تاۋارلارى جانە ت. ب. قىزمەتتەرگە جۇمسالاتىن بولادى.