اسكەري قىزمەتشى ءبىر جارىم پۇتتىق گىر تاسىن 103 رەت كوتەردى
قازاقستان رەسپۋبليكاسى قارۋلى كۇشتەرى اسكەري پوليسيا باس باسقارماسىنىڭ باستىعى، پولكوۆنيك رۋسلان قۇلىمبەتوۆتىڭ ۇسىنىسىمەن "قۋاتتى ارميا – جاڭا قازاقستان" چەللەندجى ەلوردادا ءوز مارەسىنە جەتتى، دەپ حابارلايدى Almaty-akshamy.kz.
باس اسكەري پوليسيا باسشىسىنىڭ سپورتتىق باستاماسى قازاق باتىرلارىن جاس ۇرپاققا ۇلگى ەتىپ، تاربيەلەۋگە باعىتتالعان.
"قازاقتىڭ كەڭ بايتاق جەرى الەم بويىنشا 9-شى ورىندا. اتا-بابامىز بۇل جەردى نايزانىڭ ۇشىمەن، بىلەكتىڭ كۇشىمەن قورعاعان. سوندىقتان ءبىز قاراماعىمىزداعىلاردىڭ مىقتىلىعىن تەكسەرۋدى ءجون كوردىك"، – دەدى ق ر قك اسكەري پوليسيا باس باسقارماسىنىڭ باستىعى.
پولكوۆنيك رۋسلان قۇلىمبەتوۆتىڭ باستاماسى ەڭ شالعاي گارنيزونداردا جالعاسىن تاپتى. اقمولا، قاراعاندى، الماتى، تاراز، شىمكەنت، اقتاۋ، اقتوبە وڭىرلىك گارنيزوندارىنىڭ اسكەري پوليسيا باسقارمالارى، قونايەۆ، تالدىقورعان، سەمەي، اياگوز، وسكەمەن جانە ءۇشارال قالالارىنىڭ اسكەري پوليسيا بولىمدەرى ارقىلى وتكەن 24 كەلىلىك گىر تاسى ەلورداعا جەتتى.
جارىستىڭ سوڭعى كەزەڭى قورعانىس مينيسترلىگىنىڭ رەجيم مەن قاۋىپسىزدىكتى قامتاماسىز ەتۋ جونىندەگى اسكەري پوليسيا جاساعىندا ءوتتى. ءبىرىنشى رەكورد اقتاۋدا تىركەلگەنىن ايتا كەتەيىك. اقتاۋ وڭىرلىك گارنيزونى اسكەري پوليسيا باسقارماسى اسكەري پوليسيا ءبولىمىنىڭ اسكەري قىزمەتشىسى ءبىر جارىم پۇتتىق گىر تاسىن 103 رەت كوتەردى.
بۇل ناتيجەنى استانادا جەدەل ارەكەت ەتۋ ءبولىمىنىڭ اعا مامانى 3-سىنىپتى سەرجانت قۋات ايازبايەۆ جاڭارتتى. ول ەشقاشان كاسىبي تۇردە گىر تاسىن كوتەرۋ سپورتىمەن اينالىسپاعانىن ايتتى.
"ءبىز، اسكەري قىزمەتشىلەر، ۇدايى تۇردە دەنە شىنىقتىرىپ، سپورتپەن شۇعىلدانۋىمىز كەرەك. كۇندەلىكتى جاتتىعۋلاردىڭ ارقاسىندا مەن بۇگىن وسىنداي ناتيجەگە قول جەتكىزدىم"، – دەدى قۋات ايازبايەۆ.
رەكوردتى جاڭارتقان جىگىت، اسكەردە بورىشىن وتەگەن سوڭ ارميادا كەلىسىمشارت بويىنشا قالىپ، 10 جىلدان استام ۋاقىت قىزمەت ەتىپ كەلەدى.