ازاماتتارعا دەربەس شاقىرتۋ قاعازى نەمەسە 1414 قىزمەتى ارقىلى SMS-حابارلامالارى جىبەرىلەدى.
ەلىمىزدە ازاماتتاردى كوكتەمگى مەرزىمدى اسكەري قىزمەتكە شاقىرۋ باستالدى، دەپ حابارلايدى Almaty-akshamy.kz
پرەزيدەنت جارلىعىنا سايكەس، 1 ناۋرىزدا قالالىق جانە اۋداندىق اسكەرگە شاقىرۋ كوميسسيالارى ازاماتتاردى كوكتەمگى مەرزىمدى اسكەري قىزمەتكە شاقىرۋدى باستادى.
ق ر قارۋلى كۇشتەرى باس شتابى ۇيىمداستىرۋ-جۇمىلدىرۋ جۇمىستارى دەپارتامەنتى باستىعىنىڭ ورىنباسارى، پولكوۆنيك ازامات دوسىموۆتىڭ ايتۋىنشا، كوكتەمگى مەرزىمدى اسكەري قىزمەتكە شاقىرۋ 30 ماۋسىمعا دەيىن جالعاسادى.
"قارۋلى كۇشتەردىڭ، باسقا دا اسكەرلەر مەن اسكەري قۇرالىمداردىڭ قاتارىن اسكەرگە شاقىرۋدى كەيىنگە قالدىرۋعا نەمەسە ودان بوساتۋعا نەگىزدەرى جوق، 18 بەن 27 جاس ارالىعىنداعى 20 مىڭنان استام ەر ازامات تولىقتىرادى. ونىڭ ىشىندە، قارۋلى كۇشتەرگە 9 مىڭنان استام، ۇلتتىق ۇلانعا 6 مىڭنان استام، شەكارا قىزمەتىنە 3 مىڭعا جۋىق، توتەنشە جاعدايلار مينيسترلىگىنە 300 استام، مەملەكەتتىك كۇزەت قىزمەتىنە 300 جۋىق ادام قابىلدانادى"، - دەدى دوسىموۆ.