اسكەرگە شاقىرۋ ناۋقانىن سيفرلىندىرىلادى.
بۇل مەملەكەتتىك مەكەمەلەرمەن ينتەگراسيالانعان ەلەكتروندى اقپاراتتىق بازا. بۇندا دارىگەر الدىنا كەلگەن جاستاردىڭ ءارقايسىسىنىڭ مەديسينالىق كارتاسى مەن وزگە مالىمەتتەرى جازىلعان. ءقازىر بۇل جوبا استانادا پيلوتتىق رەجيمدە ىسكە قوسىلعان، دەپ حابارلايدى Almaty-akshamy.kz 24.kz-كە سىلتەمە جاساپ.
اسكەري كوميسساريات ۇزاق جىلدار بويى قاعازباستىلىقتان ارىلا الماي، جاڭا تەحنولوگيالار قوسىلماي كەلە جاتقان مەكەمە ەدى. اسكەرگە شاقىرۋ ناۋقانىندا دارىگەرلەر بارلىق اقپاراتتى قولمەن جازىپ، تولتىراتىن. بۇل ارينە ۇزاق ۋاقىتتى تالاپ ەتەدى. ەندى ەلورداداعى قورعانىس ىستەرى جونىندەگى دەپارتامەنتتەردە ەلەكتروندى پلاتفورما بار جاڭا كومپيۋتەرلەر ورناتىلدى. بۇل جۇيە دەنساۋلىق ساقتاۋ مينيسترلىگىنىڭ اقپاراتتىق بازاسىمەن ينتەگراسيالانعان. ياعني، مەرزىمدى شاقىرۋعا ۇمىتكەرلەردى تاڭداۋ ءىسى جەڭىلدەي ءتۇستى.
«ەگەر ءبىز ديسپانسەرلىك ەسەپتى اشىپ قارايتىن بولساق، وندا ناۋقاس شىمكەنتتە تۋا بىتكەن جۇرەك اۋرۋى دياگنوزىمەن تىركەلگەنىن كورە الامىز. ياعني، بىزگە ونىڭ امبۋلاتورلىق كارتاسىن ىزدەپ، ناۋقاسپەن ساۋالناما جۇرگىزۋدىڭ قاجەتى جوق. ۋاقىت جوعالتپايمىز. بارلىعىن وسى بازادان كورە الامىز»، - دەيدى الماتى اۋدانى بويىنشا مەديسينالىق كوميسسيانىڭ ءتوراعاسى گۇلنار بۇتىنبايەۆا.
بۇل جۇيە اسكەرگە شاقىرىلۋشىلار جايلى وزگە دە دەرەكتەردى الۋعا مۇمكىندىك بەرەدى. ياعني، جۇمىس ورنى، ءبىلىمى، سوتتالماعاندىعى مەن تۋىسقاندارى جايلى تولىق اقپارات جازىلعان.
«ءبىز وسى جەردەن بالا اسكەرگە جارامدى ما، جوق پا بىردەن كورە الامىز. قوسىمشا اقپاراتتار، ساراپتامالار الۋدىڭ قاجەتى جوق. بۇرىن امبۋلاتورلىق تەكسەرىسكە 3، ال ستاسيونارلىققا 10 كۇندەي جوعالتاتىنبىز»، - دەيدى الماتى اۋدانى بويىنشا مەديسينالىق كوميسسيانىڭ ءتوراعاسى گۇلنار بۇتىنبايەۆا.
بۇل پلاتفورمانى قۇرۋعا كوپ ۋاقىت كەتپەگەن. جۇيە بۇرىننان بار. تەك ول اۋرۋحانالار مەن ەمحانالاردا دا عانا جۇمىس ىستەگەن. ەندى جۇيەنىڭ كوكجيەگى كەڭەيىپ، اسكەري كوميسسارياتتارعا دا ورناتىلعان.
«بۇل جوبانى ەندى ارى قاراي قورعانىس مينيسترلىگىنىڭ جۇيەلەرىمەن ينتەگراسيالاۋ قاجەت. ءقازىر ۆەدومستۆو تاراپىنان الدىن الا كەلىسىم بار. ياعني، اسكەرگە شاقىرىلۋشىلاردىڭ مەديسينالىق تەكسەرىستەرىنىڭ قورىتىندىلارىن ەلەكتروندى فورماتقا كوشىرۋ. ەگەر دارىگەرلەردىڭ قاراۋى كەزىندە دەنساۋلىعىنا بايلانىستى ۋاقىتشا كەيىنگە قالدىرىلسا، وندا بۇل اقپارات سول بالا مەكەن جايى بويىنشا تىركەلگەن ەمحانانىڭ بازاسىندا بىردەن كورسەتىلەدى. كەيىن ءوزىنىڭ ۋچاسكەلىك دارىگەرى ونى كورىپ، ەم-دوم شارالارىن تاعايىندايدى»، - دەيدى IT كومپانيانىڭ ديرەكتورى ەركەبۇلان جانىبەك ۇلى.
جوبادا قاۋىپسىزدىك شارالارى بارىنشا قاراستىرىلعانىن ايتا كەتۋ كەرەك. جۇيە تولىققاندى قورعالعان. ازاماتتاردىڭ دەربەس اقپاراتتارى بوگدە بىرلەۋلەردىڭ قولىنا ءوتىپ كەتپەيدى. باستىسى، بۇل جاڭاشىلدىق جەمقورلىقتى دا تومەندەتەدى دەيدى جوبا اۆتورلارى.