جوبا اياسىندا جۇمىس ىستەۋگە نيەت بىلدىرۋشىلەر كوپ
الماتى قالاسى ۇلتتىق كاسىپكەرلەر پالاتاسى ديرەكتورىنىڭ قۇقىقتىق ماسەلەلەر جونىندەگى ورىنباسارى سالتانات لەسبايەۆانىڭ ايتۋىنشا، Ashyq قوسىمشاسى نەگىزىنەن قاتىسۋشىنىڭ «كوك» مارتەبەسىن انىقتايدى دەگەن پىكىر قاتە. كەرىسىنشە، مەگاپوليستە سكانەرلەۋ كەزىندە «قىزىل» مارتەبەسىنىڭ 670 تۇرعىندا، ال «سارى» مارتەبەسىنىڭ 178 ادامدا بار ەكەنى راستالدى، دەپ حابارلايدى Almaty-akshamy.kz.
سالتانات لەسبايەۆانىڭ ايتۋىنشا، تج ۆوكزالدارى مەن اۋەجاي «قىزىل» مەن «سارى» مارتەبەسى بار قالا تۇرعىندارىن انىقتاۋ بويىنشا كوشباسشى.
«ءبىرىنشى كۇنى الماتى-2 تەمىرجول ۆوكزالىندا سكانەرلەۋ كەزىندە الىس ساپارعا شىعاتىن جولاۋشى انىقتالدى. ونىڭ ساپارى بىرنەشە كۇنگە سوزىلۋى كەرەك ەدى، الايدا «قىزىل» مارتەبەسى انىقتالدى. ول شەكتەۋ رەجيمىن بۇزدى»، – دەدى سالتانات لەسبايەۆا.
ايتا كەتسەك، بۇگىندە الماتىنىڭ 8 تۇرعىنى وسىنداي بۇزۋشىلىقتار ءۇشىن اكىمشىلىك جاۋاپكەرشىلىككە تارتىلدى.
بۇدان باسقا، Ashyq قوسىمشاسىمەن قاتار Aitu، Egov mobile قوسىمشالارى جانە Kaspi مەن «حالىق بانك» ارقىلى ەكى بانكتە تەكسەرۋگە بولادى. بۇل ازاماتتارعا ىڭعايلى بولۋ ءۇشىن جاسالعان. مارتەبەسىن ءبىلۋ ءۇشىن جسن ەنگىزۋ جەتكىلىكتى.
«بۇل ينفەكسيا جۇقتىرۋ ءقاۋپىن ازايتۋ ءۇشىن جاسالدى. ەگەر جوباعا قاتىسۋشىلار وزدەرىنە العان مىندەتتەمەلەردى ساقتاماسا، ولاردى الىپ تاستايمىن جانە ەكى ايعا دەيىنگى مەرزىمگە جۇمىس ىستەۋ مۇمكىندىگىنەن شىعارامىن. الماتىدا Ashyq جوباسىنان 39 قاتىسۋشى شىعارىلدى، ولار كەلۋشىلەر مەن ءوز قىزمەتكەرلەرىن سكانەرلەمەدى»، – دەدى سالتانات لەسبايەۆا.
سپيكەردىڭ ايتۋىنشا، الماتىدا بەلگىلەنگەن شەكتەۋلەرگە بايلانىستى جوبا اياسىندا جۇمىس ىستەۋگە نيەت بىلدىرۋشىلەر كوپ. بۇگىن تاعى دا 10 كاسىپكەر ءوتىنىم بەردى. نەگىزىنەن Ashyq بويىنشا قوعامدىق تاماقتانۋ ورىندارى، فيتنەس ورتالىقتار، كومپيۋتەرلىك كلۋبتار، مونشالار مەن كينوتەاترلار جۇمىس ىستەيدى. بارلىعى 2332 قاتىسۋشى بار. تەستىلىك رەجيمدە 148 بيزنەس سۋبەكتىسى جۇمىس ىستەيدى.
قازىرگى ۋاقىتتا سانيتارلىق-ەپيدەميولوگيالىق باقىلاۋ دەپارتامەنتىمەن جانە ازىرلەۋشىلەرمەن بىرلەسىپ جوباعا قاتىسۋشىلاردىڭ ءتىزىمىن كەڭەيتۋ ماسەلەسى قاراستىرىلۋدا. جاقىن ارادا جوبادا جوق ساۋدا-ويىن-ساۋىق ورتالىقتارى، ساۋدا ۇيلەرى، ازىق-تۇلىك ەمەس بازارلار مەن اسحانالار جەڭىلدىكتەرمەن جۇمىس ىستەي الادى.