الماتىدا قالا كۇنىن مەرەكەلەۋ اياسىندا قازاق مەملەكەتتىك سيركىنىڭ «اشىق اسپان استىنداعى سيرك» اتتى بىرەگەي شوۋى ءوتتى.
ساحنادا گران-پري يەگەرلەرى مەن حالىقارالىق سيرك ونەرى فەستيۆالىنىڭ التىن جۇلدەگەرلەرى ونەر كورسەتتى. شوۋ باعدارلاماسىندا تراپەسيا نومىرلەرى، اۋە گاماگىنداعى گيمناستيكا، اكروباتيكا، جونگلەرلەر، سايقىمازاقتار جانە وزگە دە كەلگەن قاۋىمدى قىزىقتىرعان نومىرلەر بولدى.
– «اشىق اسپان استىنداعى سيرك» شوۋى وسىمەن قاتارىنان 2 جىل ءوتىپ وتىر. مەرەكەلىك شارا قالا كۇنىنە وراي ۇيىمداستىرىلدى. نەگىزىنەن، اشىق اسپان استىندا ونەر كورسەتۋ ارتىستەر ءۇشىن وڭاي ەمەس. ويتكەنى، مانەج ۇستىندە قاجەتتى قۇرال-جابدىقتار ورناتىلسا، ال اشىق دالادا ولاردىڭ بارلىعى بولا بەرمەيدى. دەگەنمەن، ءبىزدىڭ ارتىستەرىمىز جان-جاقتى بولۋعا ۇيرەنىپ كەلەدى. سوندىقتان ءبىز ءۇشىن بۇل جوبا قاجەت. بۇگىنگى شوۋدا ءقاۋىپتى تريۋكتەر دە كورسەتىلەدى. ەل اۋزىندا «باتىلدىق دوڭگەلەگى» اتالعان قۇرىلىمدا اكروباتتارىمىز ونەر كورسەتەدى، – دەدى قازاق مەملەكەتتىك سيركىنىڭ ديرەكتورى ماقسات جايكوۆ.
سونداي-اق، ماقسات ماراتبەك ۇلى تاياۋدا وتكەن حالىقارالىق جارىستان الماتىلىق اكروباتشىلاردىڭ جۇلدە العانى تۋرالى پىكىر ءبىلدىردى.
– 14–17 قىركۇيەك اراسىندا رەسەيدىڭ سانكت-پەتەربۋرگ قالاسىندا 2ء-شى حالىقارالىق سيرك فەستيۆالى ءوتتى. بۇل الەمدەگى ەڭ ۇزدىك فەستيۆالدەردىڭ ءبىرى. سيرك الەمىنىڭ وليمپياداسى دەۋگە بولادى. وندا 16 ەلدەن بارلىعى 200-گە جۋىق ءارتىس قاتىستى. فەستيۆال قورىتىندىسى بويىنشا «قوس ماچتاداعى اكروباتتار» ءنومىرىن ورىنداعان Hassak توبى قولا جۇلدەگە يە بولدى. بۇل الماتى سيركى مەن جالپى ەلىمىز ءۇشىن ۇلكەن جەتىستىك. بولاشاق جوسپارلارىمىزعا كەلەتىن بولساق، ءبىز سيركتى 2 دەڭگەيگە بولەمىز: رەسپۋبليكالىق جانە حالىقارالىق. رەسپۋبليكالىق باعىت بويىنشا ءبىز ءوز كورەرمەندەرىمىزگە، قالا تۇرعىندارى مەن قوناقتارىنا ءارتۇرلى شوۋلار جاساي بەرەمىز. ءقازىر كوپ جىلداردان بەرى كەلمەگەن ساحا ەلىنىڭ (ياكۋتيا) ارتىستەرى كەلىپ، ونەرلەرىن پاش ەتۋدە.
سونداي-اق، بيىل الماتىدا العاش رەت حالىقارالىق سيرك فەستيۆالىن ۇيىمداستىردىق. وعان 15 ەلدەن ارتىستەر قاتىستى. بۇل باستامانى ءارى قاراي حالىقارالىق دەڭگەيدە دامىتا بەرۋ جوسپارىمىزدا بار، فەستيۆال كەلەسى جىلى جالعاسىن تاپپاق. مونتە-كارلودا 46 جىل قاتارىنان فەستيۆال ۇيىمداستىرىلىپ كەلەدى، ال ءبىزدىڭ 50 جىلدىق تاريحىمىزدا بۇل ءبىرىنشى رەت بولدى. سوندىقتان ونى ءداستۇرلى ۇردىسكە اينالدىرىپ، قازاق سيرك ونەرىن دامىتۋ، حالىقارالىق قاتىناستاردى دامىتۋ جوسپاردا بار، – دەدى قازاق مەملەكەتتىك سيركىنىڭ ديرەكتورى.