اۋىلدىق ەلدى مەكەندەردەگى مال جايۋ قاجەتتىلىكتەرىن قاناعاتتاندىرۋ ءۇشىن قايتا بولىنەدى
بيىل الماتى وبلىسىندا شامامەن 454،9 مىڭ گەكتار جەرگە ەگىن ەگۋ جوسپارلانىپ وتىر. كوبىنەسە بۇل ءداندى داقىلدار، بۇرشاق داقىلدارى جانە جەمشوپ داقىلدارى بولادى. اۋىل شارۋاشىلىعى ءمينيسترى ەربول قاراشوكەيەۆتىڭ وڭىردەگى اۋىل شارۋاشىلىعى تاۋارىن وندىرۋشىلەرمەن كەزدەسۋىندە الداعى ەگىس جۇمىستارى، سونداي-اق اوك-نىڭ دامۋى تۋرالى ايتىلدى.
ەربول قاراشوكەيەۆ «كەڭ دالا» باعدارلاماسى بويىنشا كوكتەمگى ناۋقاندى قارجىلاندىرۋعا بىلتىرعى جىلداعىداي 140 ملرد تەڭگە قاراستىرىلعانىن، سونداي-اق 3200-دەن استام تاۋار وندىرۋشىلەردى قامتۋدى جانە 2 ملن گەكتارعا ەگىس پەن ەگىن جيناۋدى قامتاماسىز ەتۋدى كوزدەپ وتىرعانىن اتاپ ءوتتى. سونىمەن قاتار ازىق-تۇلىك كورپوراسياسى ارقىلى فورۆاردتىق ساتىپ الۋ باعدارلاماسى جالعاسادى. ەلىمىزدىڭ فەرمەرلەرى نارىقتىق باعادان 15% تومەن باعامەن تومەن، جالپى كولەمى 413 مىڭ توننا جەڭىلدەتىلگەن ديزەل وتىنىن الا الادى.
ايتا كەتەيىك، وتكەن جىلى الماتى وبلىسىندا 608،6 مىڭ توننا ءداندى داقىل مەن 64،9 مىڭ توننا مايلى داقىل جينالدى. ايماق ءداستۇرلى تۇردە كارتوپ پەن كوكونىس-باقشا داقىلدارىنىڭ نەگىزگى وندىرۋشىلەرىنىڭ ءبىرى بولىپ تابىلادى. بىلتىرعى ەگىن جيناۋ ناۋقانى 502،2 مىڭ توننا كارتوپ، 800،1 مىڭ توننا كوكونىس داقىلدارى، 61،6 مىڭ توننا باقشا داقىلدارىن جيناۋمەن اياقتالدى.
مەملەكەتتىك قولداۋ تۋرالى ايتا كەلە، ەربول قاراشوكەيەۆ اۋىل حالقىنىڭ تابىسىن ارتتىرۋ جونىندەگى پيلوتتىق جوبانى ماسشتابتاۋ شەڭبەرىندە بيىل الماتى وبلىسى اۋىل تۇرعىندارى ءۇشىن 600-گە جۋىق جەڭىلدىكتى شاعىن نەسيە بەرۋ جوسپارىمەن 2،3 ملرد تەڭگە الاتىنىن اتاپ ءوتتى.
سونداي-اق، سقو-نىڭ الەۋمەتتىك-كاسىپكەرلىك كورپوراسيالار ارقىلى اوك-تە ينۆەستيسيالىق جوبالاردى قارجىلاندىرۋ بويىنشا تاجىريبەسى قاتار تاراتىلاتىن بولادى. الماتى وبلىسى بويىنشا پۋلعا قۇنى 36،8 ملرد تەڭگە بولاتىن 13 جوبا ەنگىزىلدى. بۇل ءسۇت فەرمالارى، قۇس فابريكاسى جانە سۋارۋ جوبالارى. اشم باسشىسى اوك سۋبسيديالاۋ جۇيەسىن جەتىلدىرۋ جونىندەگى جۇمىس تۋرالى ەسكە سالدى، ونىڭ شەڭبەرىندە تيىمدىلىگى تومەن جانە سىبايلاس جەمقورلىق تاۋەكەلدەرى جوعارى سۋبسيديالاردىڭ 10-عا جۋىق شاعىن ءتۇرى جويىلادى. بۇل رەتتە مەملەكەتتىك قولداۋدىڭ نەگىزگى باعىتتارى وزگەرىسسىز قالادى. ءقازىر سۋبسيديالاۋدىڭ جاڭا قاعيدالارىنىڭ جوباسى مەملەكەتتىك ورگانداردا كەلىسىلۋدەن ءوتىپ جاتىر جانە جاقىن ارادا بەكىتىلەتىن بولادى.
جەر قاتىناستارىن رەتتەۋ بويىنشا قىرۋار جۇمىس ىستەلدى. جەر ينسپەكسياسىنىڭ جۇمىسىن كۇشەيتۋ ەسەبىنەن 5،2 ملن گا اۋىل شارۋاشىلىعى جەرلەرى مەملەكەتتىك مەنشىككە قايتارىلدى، ونىڭ ىشىندە الماتى وبلىسىندا 113،6 مىڭ گا بار. بۇل جەرلەر اۋىلدىق ەلدى مەكەندەردەگى مال جايۋ قاجەتتىلىكتەرىن قاناعاتتاندىرۋ ءۇشىن قايتا بولىنەدى، دەپ تولىقتىردى مينيستر.
كەزدەسۋ سوڭىندا مينيستر سالانىڭ دامۋىنا ەرەكشە ۇلەس قوسقان فەرمەرلەرگە قۇرمەت گراموتالارى مەن العىس حاتتارىن تابىستادى. الماتى وڭىرىندە «ايگەرىم» شارۋا قوجالىعىنىڭ باسشىسى ۇلان سارپەكوۆ، «جازىلبەكوۆ جانە ك» كس باسشىسى اسقار جازىلبەكوۆ، سونداي-اق «ابىقان» شق باسشىسى سەرىك ابىقانوۆ ماراپاتتارعا يە بولدى.