وقۋ جىلى باستالعالى مەكتەپ كىتاپحانالارى 2 ملن كوركەم ادەبيەتپەن تولىقتى
حالىقارالىق كىتاپ جانە اۆتورلىق قۇقىق كۇنىمەن قۇتتىقتاعان ءبىلىم جانە عىلىم ءمينيسترى اتا-انالاردان بالالارىن كىتاپ وقۋعا باۋلۋدى سۇرادى. مينيستر بۇل ءوتىنىشىن الەۋمەتتىك جەلىدەگى پاراقشاسىندا جازدى، دەپ حابارلايدى Almaty-akshamy.kz.
«شامامەن ءبىر ايدان كەيىن وقۋشىلارىمىز كانيكۋلعا شىعادى. بارلىق اتا-انادان بالالارىن كىتاپ وقۋعا باۋلۋدى سۇرايمىن. ال بالالارىمىز كىتاپ پەن تەلەفون اراسىنداعى تەپە-تەڭدىكتى ۇمىتپايدى دەپ ۇمىتتەنەمىن. كىتاپتىڭ ەلەكتروندى نۇسقاسىن وقىعان دا جاقسى. كىتاپ قاشان دا بالالاردى تاربيەلەۋدىڭ، ەموسيونالدى اقىل-ويىن، سىني ويلاۋىن، قيالىن دامىتۋ، سونىمەن قاتار ونىڭ سوزدىك قورىن تولىقتىرۋ، اقىلدى جانە ساۋاتتى بولۋىنىڭ ۇزدىك ءادىس بولىپ قالا بەرەدى»، - دەپ جازدى اسحات ايماعامبەتوۆ.
ءمينيستردىڭ ايتۋىنشا، بالالاردى كىتاپ وقۋعا باۋلۋ ءۇشىن ەلىمىزدەگى بالاباقشالاردا، مەكتەپتەردە، كوللەدجدەر مەن ۋنيۆەرسيتەتتەردە بارلىق قاجەتتى جاعدايدى جاساۋ ماڭىزدى. 2020 جىلى «وقۋعا قۇشتار مەكتەپ» جوباسى ىسكە قوسىلعان.
«وقۋ جىلى باستالعالى مەكتەپ كىتاپحانالارى 2 ملن كوركەم ادەبيەتپەن تولىقتى. ودان بولەك، كىتاپحانالاردا كوۆوركينگ ورتالىقتار قۇرىلىپ جاتىر. بۇگىنگى تاڭدا ولاردىڭ سانى 500-گە جۋىق. مەكتەپ وقۋشىلارىنىڭ كۇندەلىكتى 20 مينۋتتىق كىتاپ وقۋ داعدىسى ەنگىزىلەدى»، - دەيدى ۆەدومستۆو باسشىسى.
مينيستر قازاقستاندىق ۋنيۆەرسيتەتتەر مەن كوللەدجدەردىڭ دە كىتاپحانالارىن اۆتوماتتاندىرىپ، قايتا جابدىقتاۋ جۇمىستارىن جۇرگىزىپ جاتقانىنا توقتالعان.
«ارينە، كىتاپتى سيفرلاندىرۋعا جانە جايلى وقۋ زالدارىن اشۋعا قانشا قارجى جۇمسالسا دا، ەڭ باستىسى - بالالاردىڭ كىتاپ وقۋعا دەگەن سۇيىسپەنشىلىگىن وياتۋ. ونى جەكە تاجىريبەمنەن دە بىلەمىن. بالالارمەن كىتاپ كورمەلەرى مەن دۇكەندەرگە، ادەبي كەشتەرگە بارىپ تۇرۋ ماڭىزدى. وسىعان دەيىن، بالا كەزىمنەن عىلىمي فانتاستيكانى جاقسى كورەتىنىمدى ايتقان ەدىم. ايزەك ازيموۆ، رەي برەدبەري، اعايىندى سترۋگاسكييلەردىڭ شىعارمالارىنا دەگەن قىزىعۋشىلىعىم كەيىن عىلىمي ادەبيەتكە دەگەن ۇلكەن قىزىعۋشىلىققا اينالدى»، - دەپ مينيستر تاجىريبەسىمەن ءبولىسىپتى.
بۇعان دەيىن حابارلاعانىمىزداي، تۇركى اكادەمياسىن قارجىلاندىرۋعا بيۋدجەتتەن 1 ملن دوللار بولىنگەن.