ءبيبىسارا اساۋبايەۆا شاحماتتان الەم چەمپيونى اتاندى، دەپ حابارلايدى اlmaty-akshamy.kz ق ر مادەنيەت جانە سپورت مينيسترلىگىنىڭ سپورت جانە دەنە شىنىقتىرۋ كوميتەتىنە سىلتەمە جاساپ.
ەستەرىڭىزگە سالا كەتەيىك، ءبيبىسارا پولشادا ءوتىپ جاتقان الەم بىرىنشىلىگىندە «راپيدتە» ەكىنشى ورىن يەگەرى اتانعان بولاتىن.
- ال بۇگىن قازاقستاندىق شاحماتشى اتالمىش جارىستا «بليستە» الدىنا جان سالماي، جەڭىس تۇعىرىنان كورىندى. وتانداسىمىزدى جارقىن جەڭىسىمەن قۇتتىقتايمىز! قازاقستاندىق شاحماتشى ءبيبىسارا اساۋبايەۆا پولشادا وتكەن 2021 جىلعى راپيد جانە بليستەن الەم چەمپيوناتى (FIDE World Rapid and Blitz 2021) اياسىنداعى ءبليس-تۋرنيردىڭ جەڭىمپازى اتاندى. جارىس باسىنان-اق ءبيبىسارا قارسىلاستارىنىڭ وق بويى وزىق كەتىپ، تۋرنير اياقتالۋعا ءبىر تۋر قالعاندا جەڭىسكە جەتتى. بۇل - وتاندىق سپورت ءۇشىن تاريحي وقيعا، ويتكەنى ءبىزدىڭ شاحماتشىمىز الەمدىك شاحمات تۇرلەرى تاريحىندا ەڭ جاس الەم چەمپيونى اتاندى، - دەلىنگەن ق ر مادەنيەت جانە سپورت مينيسترلىگىنىڭ وسى وقيعاعا قاتىستى تاراتقان اقپاراتىندا.
بۇعان دەيىن قازاقستاندىق سپورتشى كلاسسيكالىق شاحماتتان 8، 10، 12 جانە 14 جاسقا دەيىنگى قىزدار اراسىندا الەم چەمپيونى، 7، 9 جاسقا دەيىنگى مەكتەپ وقۋشىلارى اراسىندا الەم چەمپيونى اتانعان.
سونداي-اق، كۇنى كەشە عانا 17 جاسار ب.اساۋبايەۆا تاماشا ونەر كورسەتىپ، وسى الەم چەمپيوناتى اياسىندا راپيدتەن (جىلدام شاحماتتان) 2-ورىندى جەڭىپ العان بولاتىن.
بليس ءتۋرنيرىنىڭ قورىتىندىسى بويىنشا، ەكىنشى ورىندى ەكى كۇن بۇرىن راپيدتەن الەم چەمپيونى اتانعان رەسەيلىك الەكساندرا كوستەنيۋك السا، رەسەيدىڭ تاعى ءبىر وكىلى ۆالەنتينا گۋنينا ءۇشىنشى ورىندى يەلەندى.