قازاقستاننىڭ ەڭبەك ەرى، كينو جانە تەاتر ءارتىسى ءاسانالى ءاشىموۆ تە جولداۋ جايىندا پىكىر ءبىلدىردى.
«قاسىم-جومارت كەمەل ۇلىنىڭ قازاقستان حالقىنا جولداۋىنداعى كەزەكتەن تىس سايلاۋ، 7 جىلدىق مەرزىمگە سايلاۋ – بۇلار قۇلاققا قوناتىن اڭگىمە. 7 جىل - قىزمەت ىستەيتىن ىسكەر ادامعا از مەرزىم ەمەس. قازاق ۇعىمىندا 7 دەگەن كيەلى سان. ۇلىلارىمىزدىڭ دا ايتىپ كەتكەن سوزدەرى بار. پرەزيدەنتتىڭ وسىعان قاتىستى ويى، كوزقاراسى ۇنايدى. عىلىم اكادەمياسىن ورنىنا قويۋ جاقسى باستاما. اسىرەسە، ۇلتتىق قوردان 18 جاسقا دەيىنگى بالالارىڭ ەسەبىنە قارجى اۋدارىپ وتىرۋ – اتا-انا ءۇشىن ۇلكەن كومەك. ۇلى ماسەلەنىڭ ءوزى كىشكەنتاي نارسەدەن باستالادى»، – دەدى ءاسانالى ءاشىموۆ.
سونداي-اق حالىق ءارتىسى جالعان ۇران سوزبەن ەمەس، ىسپەن دالەلدەيتىن ۋاقىت جەتكەنىن ايتادى.
«قازاقستان جان-جاقتى جاڭارۋى كەرەك. ۇرانمەن ەمەس، جاڭا ىسپەن ءوسۋىمىز كەرەك. تالاي قيىنشىلىقتان حالقىم وتەر، ءبىراق قوي ۇستىنە بوزتورعاي جۇمىرتقالايتىن زامان كەلەر دەپ ەدى بابالارىمىز. سول زامان كەلگەن بولۋى كەرەك. حالىقتىڭ ءال-اۋقاتى، مادەنيەتى، ادەبيەتى، عىلىمى ءوسىپ جاتىر. عىلىم اكادەمياسى سوعان دالەل. ءبىزدىڭ پرەزيدەنتىمىز ديپلومات، ساۋاتتى، قاراپايىم، سونىسىمەن حالىققا ۇنايدى»، – دەدى ءاسانالى ءاشىموۆ.