رەسەيدە ۇستالعان ول 223 ملن تەڭگەدەن استام قارجىنى جىمقىردى دەپ كۇدىككە ىلىنگەن.
كۇدىكتى قىلمىستىق جاۋاپتىلىققا تارتۋ ماقساتىندا رەسەيدەن قازاقستانعا ەكستراديسيالاندى، دەپ حابارلايدى aqshamnews.kz
ول پاۆلوداردا 2019-2023 جىلدار ارالىعىندا تانىستارىنان بيزنەستى دامىتۋ ءۇشىن اقشا الىپ، كەپىلدىك رەتىندە وزىنە تيەسىلى ەمەس پاتەردى ۇسىنعان.
"ونىڭ قىلمىستىق ارەكەتتەرى سالدارىنان پاۆلودار قالاسىنىڭ 66 تۇرعىنىنا جالپى سوماسى 223 ملن تەڭگەدەن اسا شىعىن كەلتىرىلدى.قىلمىس جاساعاننان كەيىن كۇدىكتى جاسىرىنىپ، سوعان بايلانىستى ول حالىقارالىق ىزدەۋگە جاريالانعان.وتكەن جىلدىڭ جەلتوقسان ايىندا ول رەسەي فەدەراسياسى ادىگەيا رەسپۋبليكاسىنىڭ اۋماعىندا ۇستالدى، سودان كەيىن قازاقستان رەسپۋبليكاسى باس پروكۋراتۋراسىنىڭ ءوتىنىشى بويىنشا قازاقستانعا ەكستراديسيالاندى"،-دەپ جازدى باس پروكۋراتۋرا.
قازىرگى ۋاقىتتا كۇدىكتى ۋاقىتشا ۇستاۋ يزولياتورىنا قامالدى.
ايىپتالعان قىلمىستى جاساعانى ءۇشىن مۇلكى تاركىلەنىپ، بەس جىلدان ون جىلعا دەيىنگى مەرزىمگە باس بوستاندىعىنان ايىرۋ جازاسى قاراستىرىلعان.