ەلوردانىڭ №2 بايقوڭىر اۋداندىق سوتىندا ارىستانبەك مۇحامەدي ۇلى جانە ونىڭ سىبايلاستارىنا قاتىستى ءىستىڭ كەزەكتى وتىرىسى ءوتتى، دەپ حابارلايدى قازاقپارات ءتىلشىسى.
ۇلتتىق مۋزەيدىڭ بۇرىنعى ديرەكتورى ارىستانبەك مۇحامەدي ۇلى سوت الدىنداعى سوڭعى ءسوزىن ايتتى.
ءبىر جىلدان استام قازاقستاندىقتار جانە الەم «التىن ادام» كورمەسىنە قاتىستى قىلمىستىق ءىستىڭ بارىسىن باقىلاپ كەلەدى. بيىل 17 ساۋىردە سوتتىڭ العاشقى وتىرىسىندا مەن ايتقام، مەملەكەت باسشىسىنىڭ تاپسىرماسىن ورىنداۋ ماقساتىندا مەن ءۇندىستاننان «التىن ادامدى» ەلگە امان-ساۋ الىپ كەلدىم. ەلشىلىك باسقا دا قۇزىرلى ورگانداردىڭ كومەگىمەن لوكداۋننىڭ ءدال الدىندا قۇندى دۇنيەنى قازاقستانعا جەتكىزدىك. مەن زاڭ بۇزعان جوقپىن جانە كىنامدى تولىق مويىندامايمىن. ونى بۇعان دەيىن دە ايتقام، - دەدى ول.
سونداي-اق، تاعىلعان ايىپتاردىڭ بىرەۋى دە دالەلدەنبەگەنىن ايتىپ وتىر.
وسىدان 2 اي بۇرىن باستالعان سوت پروسەسى مەنىڭ عانا ەمەس، باسقا دا ايىپتىلاردىڭ سوزدەرىنىڭ شىنايىلىعىن كورسەتتى. مەنىڭ شىنايىلىعىمنىڭ دالەلى – ايىپتاۋ اكتىسىنىڭ جاڭا تۇجىرىمى. وندا پروكۋرور ۇرلاۋ، ءسوز بايلاسۋ جانە زاڭدى بۇزۋ فاكتىلەرى بويىنشا بىردە-بىر دالەل كەلتىرمەيدى. بارلىق شاقىرىلعان كۋاگەرلەر قارجى جىمقىرۋ فاكتىسىنىڭ بولماعانىن ايتتى. ەشقانداي زاڭسىز ارەكەتتەردىڭ جوقتىعىن سەنىمدى تۇردە قايتالادى، - دەدى ارىستانبەك مۇحامەدي ۇلى.