الماتى وبلىسىنىڭ ەڭبەكشىقازاق اۋدانىنداعى اۋىل تۇرعىندارى ءسۇت زاۋىتى قالدىقتارى ارىق سۋىنا توگىلىپ، سونىڭ كەسىرىنەن جاعىمسىز ءيىس شىققانىنا شاعىمداندى، - دەپ حابارلايدى Almaty-akshamy.kz Inform.kz-كە سىلتەمە جاساپ.
الماتى وبلىستىق ەكولوگيا دەپارتامەنتىنىڭ ماماندارى تۇرعىنداردىڭ شاعىمىنان كەيىن لاباسى اۋىلدىق وكرۋگىنە بارىپ، جاعدايدى تەكسەرىپ جاتىر. حالىق ارىزدارىن الەۋمەتتىك جەلىگە ۆيدەو تۇرىندە جۇكتەپ، جەتكىزگەن.
«دەپارتامەنت وكىلدەرى لاباسى اۋىلدىق وكرۋگىنىڭ تۇرعىندارىمەن كەزدەستى. زەرتحانا ماماندارى سۋدان سىناما الدى. ءقازىر بارلىعى تەكسەرىلىپ، شىققان قورىتىندى بويىنشا ءتيىستى شارا قولدانىلاتىن بولادى. اتالعان ماسەلەنى ەكولوگيا دەپارتامەنتىنىڭ باسشىلىعى باقىلاۋعا الدى»، - دەلىنگەن الماتى وبلىستىق ەكولوگيا دەپارتامەنتىنىڭ حابارلاماسىندا.