قاراعاندى وبلىسىنىڭ اكىمى ەرماعانبەت بولەكپايەۆ QARMET جاڭا ينۆەستورى اندرەي لاۆرەنتيەۆتى ەڭبەك ۇجىمىنا تانىستىردى. ءوز كەزەگىندە ول ۆاديم ءباسيندى كومپانيانىڭ باس ديرەكتورى دەپ جاريالادى، دەپ حابارلايدى Almaty-akshamy.kz.
قازاقستاندىق Qazaqstan Steel Group (QSG) كومپانياسى بۇرىنعى ArcelorMittal Temirtau كاسىپورنىنا ينۆەستور بولدى.
كومپانيا اتىنان كاسىپكەر اندرەي لاۆرەنتيەۆ ونەركاسىپ جانە قۇرىلىس مينيسترلىگىمەن بىرگە ArcelorMittal Temirtau اكتيۆتەرىن ساتىپ الۋ كەلىسىمىنە قول قويدى.
«كەلىسىم شارتى بويىنشا QSG امت اكتيۆتەرى $286 ملن-عا ساتىپ الىندى، سونداي-اق جىل سايىنعى 4 رەت تەڭ جارنامەن تولەنەتىن $450 ملن مولشەرىندەگى قاراجات كەپىلدى تۇردە كەيىنگە قالعان تولەمدى جۇزەگە اسىرادى. سونىمەن قاتار، كەلىسىم جابىلعان كەزدە تاعى امت-نىڭ وتەلمەگەن توپىشىلىك قارىزىن تولەۋ ءۇشىن 250 ميلليون دوللار تولەنەدى»، — دەپ حابارلادى قاراعاندى وبلىسى اكىمدىگى.
كەلىسىمگە ساي كومپانيا كەيىننەن $3 ملرد استام قارجىنى ينۆەستيسيالاۋ مىندەتتەمەسىن وزىنە الادى، ونىڭ ىشىندە 1،3 ملرد دوللار كەلەسى جىلى ينۆەستيسيالانادى.
«ارينە، كومپانيانىڭ جاڭا يەسىنىڭ الدىندا ماڭىزدى مىندەتتەر تۇر، ءبىرىنشى كەزەكتە — ەڭبەك قاۋىپسىزدىگىن قامتاماسىز ەتۋ جانە جاعداي جاساۋ، قىزمەتكەرلەردىڭ ءال-اۋقاتىن ارتتىرۋ، سونداي-اق الەۋمەتتىك جوبالار ارقىلى جەرگىلىكتى قوعامداستىقتى دامىتۋعا بەلسەندى قاتىسىپ، كومەك كورسەتۋى كەرەك»، — دەدى ەرماعانبەت بولەكپايەۆ.
كەزدەسۋدە ۆاديم باسين QARMET كومپانياسىنىڭ باس ديرەكتورى رەتىندە تانىستىرىلدى.
ۇلتتىق ينۆەستور قىسقا مەرزىم ىشىندە جۇمىس بارىسىنداعى ۇجىمدىق كەلىسىمشارت پەن كاسىپورىن جۇمىسشىلارىنىڭ ەڭبەكاقىسىن تولەۋ جۇيەسىنىڭ ساقتالۋىن، ءوندىرىس ورنىنىڭ قاۋىپسىزدىگىن جانە ەكولوگيالىق احۋالىن ودان ءارى جاقسارتۋ، ءوندىرىستى جاڭعىرتۋ جانە قايتا ۇيىمداستىرۋ، شىعارىلاتىن ءونىم كولەمىن، نومەنكلاتۋراسىن جانە تۇرلەرىن ۇلعايتۋ سەكىلدى مىندەتتەمەلەردى ءوز جاۋاپكەرشىلىگىنە الىپ وتىر.
كومپانيا كاسىپورىننىڭ قىزمەتىنە تالداۋ جۇرگىزگەننەن كەيىن ناقتى مالىمەتتى ينۆەستوردىڭ رەسمي وكىلدەرى ارقىلى بەرەتىنىن حابارلايدى.