كاسىپورىن بۇل شەشىممەن كەلىسپەي، شاعىم تۇسىرگەن.
«ارسەلورميتتال تەمىرتاۋ» كومپانياسىنا 5،8 ملرد تەڭگە ايىپپۇل سالىندى. ورتالىق كوممۋنيكاسيالار قىزمەتىندە وتكەن بريفينگتە ەكولوگيالىق رەتتەۋ جانە باقىلاۋ كوميتەتىنىڭ ءتوراعاسى زۇلفۇحار جولداسوۆ وسىلاي مالىمدەدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ارسەلورميتتال تەمىرتاۋ» مەتاللۋرگيالىق كەشەنى – تەمىرتاۋ قالاسىنداعى اتموسفەرالىق اۋانى لاستاۋشى نەگىزگى كاسىپورىن. ونىڭ اۋانى لاستاۋداعى ۇلەسى – 86،4 پايىز. جىل سايىن «ارسەلورميتتال تەمىرتاۋ» كاسىپورنىنا ەكولوگيالىق باقىلاۋ جۇرگىزىلەدى. بيىلعى 9 ايدا اۋماقتىق ەكولوگيا دەپارتامەنتى كومپانياعا 7 جوسپارلى جانە جوسپاردان تىس تەكسەرۋ جۇرگىزدى. ونىڭ ناتيجەسى بويىنشا ەكولوگيالىق زاڭنامانىڭ بۇزىلۋى فاكتىلەرى انىقتالدى. ماسەلەن، بەيورگانيكالىق شاڭ-توزاڭداردى نورماتيۆتەن تىس شىعارعان، بۇرىن بەرىلگەن نۇسقامالاردى ورىنداماعان جانە گاز شىعاتىن قۇرىلعىلاردى ۇستاۋ بويىنشا ءتيىمدى شارالار قابىلداماعان»، - دەپ ءمالىم ەتتى زۇلفۇحار جولداسوۆ.
ونىڭ ايتۋىنشا، اتالعان كەمشىلىكتەر نەگىزىندە «ارسەلورميتتال تەمىرتاۋ» كومپانياسىنا جالپى سوماسى 5،8 ملرد تەڭگە ايىپپۇل سالىنعان. كاسىپورىن بۇل شەشىممەن كەلىسپەي، شاعىم تۇسىرگەن. زۇلفۇحار جولداسوۆ ءقازىر ءىستىڭ سوتتا قارالىپ جاتقانىن اتاپ ءوتتى.