اقش-تىڭ اۋعانستان بويىنشا ارنايى وكىلى توماس ۋەست اۋعانستان بويىنشا س5+1 ارنايى سەسسياسىنا قاتىسۋ ءۇشىن استاناعا كەلدى.
ق ر سىرتقى ىستەر مينيسترلىگى الاڭىندا وتكەن سەسسيا اياسىندا قازاقستان، قىرعىزستان، تاجىكستان، تۇرىكمەنستان، وزبەكستان جانە اقش وكىلدەرى گۋمانيتارلىق كومەك كورسەتۋ، ادام قۇقىقتارىن قورعاۋ، اۋعانستانمەن حالىقارالىق ىنتىماقتاستىق، سونداي-اق قاۋىپسىزدىكتى قامتاماسىز ەتۋ جانە تەرروريزمگە قارسى كۇرەس بويىنشا ءبىرقاتار ماسەلەلەردى تالقىلادى، دەپ حابارلايدى Almaty-akshamy.kz.
قازاقستان تاراپىنان قاتىسقان ق ر سىرتقى ىستەر مينيسترلىگىنىڭ ەرەكشە تاپسىرمالار جونىندەگى ەلشىسى تالعات قالييەۆ اۋعانستانداعى جاعدايدى تۇراقتاندىرۋ ماسەلەسىنە ءبىرىڭعاي كەلىسىلگەن پراگماتيكالىق كوزقاراستىڭ ماڭىزدىلىعىنا سەسسياعا قاتىسۋشىلاردىڭ نازارىن اۋداردى.
اقش-تىڭ ارنايى وكىلىن قازاقستان رەسپۋبليكاسى سىرتقى ىستەر ءمينيسترىنىڭ ءبىرىنشى ورىنباسارى قايرات وماروۆ قابىلدادى. كەزدەسۋ بارىسىندا امەريكالىق تاراپ قازاقستان ۇكىمەتىنىڭ اۋعان حالقىنا كومەك كورسەتۋ بويىنشا قابىلداپ جاتقان شارالارىن قۇپتاپ، الەۋمەتتىك-ەكونوميكالىق جاعدايدى تۇراقتاندىرۋ شارالارىن اتاپ ءوتتى.
ق.وماروۆ قازاقستان اۋعانستانعا كومەك كورسەتۋ جانە ەلدەگى كۇردەلى گۋمانيتارلىق داعدارىستان شىعۋ جولدارىن ىزدەۋ بويىنشا حالىقارالىق كۇش-جىگەردى بىرىكتىرۋدى جاقتايتىنىن اتاپ ءوتتى. اتاپ ايتقاندا، ق ر پرەزيدەنتى قاسىم-جومارت توقايەۆتىڭ ورتالىق ازيا مەن اۋعانستان ەلدەرىنىڭ الەۋمەتتىك-ەكونوميكالىق جانە ساۋدا-ينۆەستيسيالىق دامىتۋ سالالارىنداعى ىنتىماقتاستىعىن ىلگەرىلەتۋگە باعىتتالعان الماتىدا بۇۇ-نىڭ ايماقتىق تۇراقتى دامۋ ورتالىعىن قۇرۋ تۋرالى باستاماسىنا نازار اۋدارىلدى.
ايتا كەتۋ كەرەك، C5+1 – 2015 جىلى قۇرىلعان ايماقتاعى بەس ەلدىڭ (قازاقستان، قىرعىزستان، تاجىكستان، تۇرىكمەنستان جانە وزبەكستان) اقش-پەن ساۋدا-ەكونوميكالىق جانە ءوزارا مۇددەدەگى باسقا دا سالالارداعى ءوزارا ءىس-قيمىلى جونىندەگى ايماقتىق ديپلوماتيالىق پلاتفورما.