بۇگىن استانا قالاسىندا قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ ارداگەرى وتستاۆكاداعى پولكوۆنيك جەڭىس راشيت ۇلى رامازانوۆتى ەسكە الۋعا ارنالعان شاحماتتان تۋرنير ءوتتى. اتالمىش شاراعا ارنايى ورگاندار ارداگەرلەرى مەن ساپتاعى قىزمەتكەرلەر جانە وتباسى مۇشەلەرى قاتىسىپ، ب ا ق سىناستى، دەپ حابارلايدى aqshamnews.kz.
تۋرنير اينالمالى ادىسپەن، 7 ويىننان تۇردى. بارلىق قاتىسۋشىلار ءوزارا ءبىر ويىن وتكىزدى. شارا ۇيىمداستىرۋشىلارى - ق ر ۇقك ارداگەرلەر كەڭەسى الدىمەن جەڭىس راشيت ۇلىنىڭ ءومىر جولىنا توقتالدى.
-جەڭىس راشيت ۇلىنىڭ ومىرلىك جولى كوپتەگەن قىزمەتكەرلەر مەن جاس بۋىن وكىلدەرى ءۇشىن ۇلگى. ونىڭ وتانعا دەگەن رياسىز سۇيىسپەنشىلىگى مەن ماماندىققا دەگەن شەكسىز ماحابباتى كاسىبي قاسيەتتەرىن تولىقتىرىپ تۇراتىن. پولكوۆنيك جەڭىس رامازانوۆپەن بىرگە قىزمەت اتقارعان ادامدار ونىڭ تەك جاقسى قاسيەتتەرىن ەسكە تۇسىرەدى. بۇگىنگى ءتۋرنيردىڭ ءمانى دە اعا بۋىن وكىلدەرىنىڭ ەڭبەك جولى نەگىزىندە وسكەلەڭ ۇرپاقتى تاربيەلەۋ،-دەدى "ق ر ۇقك ارداگەرلەر كەڭەسى" رقب ء-نىڭ ءتوراعاسى پولكوۆنيك كەنجەبولات بەكنازاروۆ.
ومىرلىك جارى رايسا راحىمجان قىزى بولسا، كەيىپكەرىمىزدىڭ وتباسىنداعى ۇستانىمى، تالىم-تاربيەسى جانە ومىرلىك كوزقاراستارى تۋرالى تىن دەرەكتەرمەن ءبولىستى. سونداي-اق، پولكوۆنيك ج. رامازانوۆتىڭ ۇلى بولات جەڭىس ۇلى دا كەلىپ، اكەسى تۋرالى ەستەلىكتەرىن ايتىپ ءوتتى.
-مەن اكەمنىڭ جولىن جالعاستىرىپ كەلە جاتقانىما ءدان ريزامىن. اكەم ومىردەن قايتار تۇستا، بالالارىن وسىرگەنىنە، شاكىرتتەرىن وقىتقانىنا جانە ارنايى ورگانداردا ماماندىعىنا ادال بولعانىنا ومىرگە العىسى شەكسىز ەكەنىن ايتقان. شىن مانىندە، اكەمنىڭ اتىن وشىرمەي، وسىنداي تۋرنير ۇيىمداستىرىپ وتىرعان ۇقك باسشىلىعىنا، ارداگەرلەر كەڭەسىنە ءوز راحمەتىمدى ايتامىن، - دەدى ۇلى بولات جەڭىس ۇلى.
تۋرنير ءوز مارەسىنە جەتتى. ساپتاعى ۇلتتىق قاۋىپسىزدىك كوميتەتىنىڭ قىزمەتكەرلەرى جەڭىس تۇعىرىنا كوتەرىلدى. الدىڭعى ءۇش ورىن يەلەرى كۋبوك مەدالدارمەن جانە رامازانوۆتار دايىنداعان باعالى سىيلىقتارمەن ماراپاتتالدى. جارىس ۇيىمداستىرۋشىلاردىڭ ءبىرى استانا قالاسى بويىنشا شاحمات فەدەراسياسىنىڭ جەتەكشىسى، ۇقك ورگاندارىنىڭ ارداگەرى وتستاۆكاداعى گەنەرال-مايور ابىلاي تاستانبەكوۆ ءبىرىنشى ورىن جەڭىمپازىن ءوز قولىمەن ماراپاتتاپ، كەلەسى تۋرنيردە جەڭىمپازدارعا اقشالاي سىيى تولەنەتىنىن ايتىپ ءوتتى. ەكىنشى ورىن جەڭىمپازىن رايسا راحىمجان قىزى ماراپاتتاسا، ءۇشىنشى ورىندى كەيىپكەرىمىزدىڭ ۇزەڭگىلەس دوسى، وتستاۆكاداعى گەنەرال-مايور ناعاشىباي اتشاباروۆ ماراپاتتادى.
شارا سوڭىندا اق داستارحان جايىلىپ، مارقۇمنىڭ ءارۋاعىنا ارناپ قۇران وقىلدى.
ايتىپ ءوتۋ كەرەك، جەڭىس راشيت ۇلى 1944 جىلى 5 تامىزدا قازىرگى سولتۇستىك قازاقستان وبلىسى ياۆلەنكا اۋىلىندا دۇنيەگە كەلگەن. 1963 جىلى ءوز ەركىمەن وتان الدىنداعى ازاماتتىق بورىشىن اتقارۋعا اتتانىپ، قيىر شىعىستىق اسكەري وكرۋگتىڭ ستراتەگيالىق ماڭىزعا يە راكەتالىق اسكەردىڭ ۆزۆود كومانديرىنىڭ ورىنباسارى بولىپ اسكەري قىزمەتىن اتقارعان. كەيىن ياۆلەنكا اۋلىندا اۋداندىق حالىق دەپۋتاتتارى كەڭەسىندەگى اتقارۋشى كوميتەتىنىڭ ازاماتتىق قورعانىسىنىڭ شتاب باستىعى بولىپ قىزمەت ەتەدى.1967 جىلى ماسكەۋ قالاسىنداعى ف.ە. دزەرجينسكيي اتىنداعى قىزىل تۋلى جوعارى مەكتەبىنە وقۋعا تۇسەدى. جاپون ءتىلىن مەڭگەرگەن زاڭگەر ماماندىعىن يەلەنگەننەن سوڭ ول تۋلا وبلىستىق مقك باسقاراماسىندا ارنايى ورگانداردا العاشقى قىزمەتىن باستايدى. 1980 جىلى اتاقتى ماسكەۋ وليمپياداسىنداعى قاۋىپسىزدىك شارالارىن قاماتاسىز ەتۋگە قاتىسادى. ءوزىن ۇزدىك قىرىنان تانىنتقان جەڭىس رامازانوۆ مقك ءتوراعاسىنىڭ گراموتاسىمەن ماراپاتتالادى. كەيىن تۋعان ەلىنە ورالىپ، مقك باسقارماسىندا جۇمىس جاسايدى. 1988 جىلى وزات وفيسەر رەتىندە قازسسر مقك ورتالىق اپپاراتى 5 باسقارماسىنا ءبولىم باسشىسى لاۋازىمىنا تاعايىندالادى. 1991 جىلى ەلىمىز تاۋەلسىزدىك العان جىلدارى ق ر ۇقك ينسپەكسياسىنىڭ باس ينسپەكتورى بولىپ قالتقىسىز قىزمەتىن جالعاستىرادى. 1994-1997 جىلدار ارالىعىندا باسقارما باسشىسىنىڭ ورىنباسارى رەتىندە تالاي قىزمەتتەر مەن بولىمدەرگە باسشىلىق جاسايدى.
قۇرمەتتى ەڭبەك دەمالىسىنا شىققاننان كەيىن ق ر ۇقك اكادەمياسىندا ۇستازدىق ەتىپ، ومىرلىك تاجىريبەسىمەن ءبولىستى. ارنايى ورگاندارداعى ونەگەلى قىزمەتى بارىسىندا وزىنەن كەيىن ءبىرتالاي بۋىندى تاربيەلەدى. كوپتەگەن شاكىرتتەردى ءوسىردى.
بولاشاق بارلاۋشىلاردى دايىندايتىن وقۋ ورنىنداعى قۇرمەت تاقتاسىندا جەڭىس راشيت ۇلىنىڭ سۋرەتى ءالى كۇنگە دەيىن ءىلىنىپ تۇر. سوندا «مەن ءوزىمدى باقىتتى سانايمىن. ويتكەنى ماماندىعىمدى ساتپادىم، ۇلتتىق قاۋىپسىزدىكتى قامتاماسىز ەتىپ كەلەمىن»،-دەيتىن سوزدەرى جازىلعان. استانا قالاسىندا ارداگەرىمىز ق ر ۇقك «بارلاۋ» قىزمەتىنىڭ «قورعان» ورتالىعىنا ۇستازدىق ەتكەن. ۆەدومستۆالىق «اقيقات» جۋرنالىنا ماقالا جازىپ، ويلارىمەن بولىسكەن. سونىمەن قاتار، ۆەدومستۆالىق «ارداگەر» جۋرنالىنىڭ نەگىزىن قالاۋعا اتسالىستى. ءوزى دە قولىنا قالام ۇستاپ كولەمدى – كولەمدى ماقالالار جازدى. ب ا ق – نا شىعىپ ءوز ويىمەن اشىق بولىسەتىن. استانا جانە الماتى قالالارىندا لاڭكەستىككە قارسى حالىقارالىق عىلىمي – تاجىريبەلىك كونفەرەنسيالارعا قاتىسىپ، باياندامالارىن جاساعان. زاماننىڭ اجداھاسى سانالاتىن – لاڭكەستىكپەن كۇرەس تۋرالى ءبىر تالاي ەڭبەكتەرى بار. قىزمەت بارىسىندا 20 ۆەدومستۆالىق ماراپاتتارمەن ماراپاتتالعان.