توپتىڭ مۇشەلەرى اتىس قارۋىن قولدانىپ، ءتۇرلى قاقتىعىستار ۇيىمداستىرعان
5 ناۋرىزدا ءىىم ۇيىمداسقان قىلمىسقا قارسى كۇرەس دەپارتامەنتى مەن ۇقك 5ء-شى دەپارتامەنتى بىرلەسىپ، قاراعاندى وبلىسىنداعى كريمينوگەندىك جاعدايعا ۇزاق ۋاقىت بويى تەرىس اسەر ەتىپ كەلگەن قىلمىستىق توپ ارەكەتىنىڭ جولىن كەسۋ بويىنشا ارنايى وپەراسيا جۇرگىزدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
بۇل توپتىڭ مۇشەلەرى اتىس قارۋىن قولدانىپ، ءتۇرلى قاقتىعىستار ۇيىمداستىرعان. وسىلايشا قوعامدىق ءتارتىپتى بۇزعان. جەدەل دەرەكتەر بويىنشا توپ مۇشەلەرىنىڭ سانى 50-گە جۋىق، ونىڭ ىشىندە قۇقىق قورعاۋ ورگاندارىنىڭ بۇرىنعى قىزمەتكەرلەرى، سونداي-اق كۇزەت ۇيىمدارىنىڭ قىزمەتكەرلەرى دە بار.
كوشباسشى مەن توپ مۇشەلەرى اراسىندا ناقتى يەرارحيا قۇرىلعان. ءاربىرىنىڭ مىندەتى مەن ءوز ءرولى بولعان. جاسىرىنۋ شارالارى قاتتى ساقتالعان. وتكىزىلگەن ارنايى ءىس-شارالار ناتيجەسىندە ءوڭىردىڭ ءىرى ونەركاسىپتىك وبەكتىلەرىندە، ونىڭ ىشىندە «ارسەللور ميتتال تەمىرتاۋ» اكسيونەرلىك قوعامىندا تاۋارلىق-ماتەريالدىق قۇندىلىقتاردى ۇرلاۋ فاكتىلەرى اشىلدى. توپ مۇشەلەرىنىڭ ءبىرقاتار اشىلماعان اۋىر جانە اسا اۋىر قىلمىستارعا قاتىسى بارى انىقتالدى – بۇل بوپسالاۋ، دەنساۋلىققا اۋىر زيان كەلتىرۋ، كىسى ولتىرۋگە وقتالۋ جانە بۇزاقىلىق. ارنايى وپەراسيا بارىسىندا 100-دەن استام ءتىنتۋ ءىس-شارالارى جۇرگىزىلدى، 9 اتىس قارۋى، 200-گە جۋىق ءوق-دارى، گراناتومەت، تروتيل، گراناتالار، قۇجاتتار جانە جالعان مورلەر، ءدىني ادەبيەتتەر، قولما-قول اقشا، جىلجىمالى جانە جىلجىمايتىن مۇلىك، سونداي-اق قاشىقتان تىڭداۋعا ارنالعان ارنايى تەحنيكالىق تىڭداۋ قۇرالدارى تاركىلەندى. پوليسياعا 40 ادام جەتكىزىلدى. جەدەل-تەرگەۋ شارالارى جالعاسۋدا.