الماتى قالاسى مەدەۋ اۋدانى اكىمدىگىنىڭ قولداۋىمەن ەلوردانىڭ 25 جىلدىق مەرەيتويىنا وراي «ارمان قالا - استانا» اتتى مەرەكەلىك كونسەرت ۇيىمداستىرىلدى.
كونسەرتتىك باعدارلامانىڭ ماقساتى – ەلدىڭ پاتريوتتىق رۋحىن كوتەرۋ، ايبىنىنىمىزدى اسقاقتاتۋ.
مەرەكەنى تاماشالاۋعا الماتى قالاسىنىڭ تۇرعىندارى مەن قوناقتارى، وقۋشىلار، انشى-بيشىلەر جانە ت.ب. قاتىستى.
6 شىلدە ايرىقشا كۇن. تاريحي وقيعا بولعان كەزەڭ. قازاق ەلىنىڭ باس قالاسىنىڭ ىرگە تاسى قالانعان شاق. كۇللى دۇنيەگە دەربەس ەلدىڭ ايبىنىن تانىتقان مەرەيلى ءسات.
«بۇگىنگى تاڭدا استانا كۇنىنە ورايلاستىرىپ كونسەرتتىك ءىس-شارا ۇيىمداستىرىلدى. ەلىمىزدىڭ باس قالاسىنىڭ تۋعان كۇنىن تويلاۋ ءۇشىن ءانشى، ءبيشى، ارنايى ونەر ماماندارى شاقىرىلدى. مەدەۋ اۋدانىندا 17 شارا قاراستىرىلعان. شامامەن 300 ادامعا لايىقتالعان كونسەرت وتكىزىلدى»، - دەدى مادەنيەت جانە تىلدەردى دامىتۋ ءبولىمىنىڭ باسشىسى ايدار ايداربەكوۆ.
كونسەرتكە قالا تۇرعىندارى دا قاتىسىپ، مەرەكەنى تاماشالاپ، وزدەرىنىڭ كوڭىل-كۇيلەرىمەن ءبولىستى.
«ءبىز ەلوردامىزدىڭ مەرەيتويىنا وراي جاسالعان كونسەرتكە كەلدىك. وزىممەن بىرگە نەمەرەمدى ەرتىپ اكەلەدىم. ءاربىر وسكەلەڭ ۇرپاق ءوز ەلىنىڭ پاتريوتى بولعانى ابزال. ەلىمىزدە تەك بەيبىتشىلىك پەن تاتۋلىق سالتانات قۇرا بەرسىن»، - دەدى قالا تۇرعىنى قالدىباي اسانوۆ.