الماتىدا فيزيكالىق، پسيحيكالىق نەمەسە الەۋمەتتىك ەرەكشەلىكتەرىنە قاراماستان، بارلىق جاستار ءۇشىن ءوزىن - ءوزى جۇزەگە اسىرۋدىڭ تەڭ مۇمكىندىكتەرىن قامتاماسىز ەتەتىن «ءاربىر ادام ماڭىزدى» الەۋمەتتىك جوباسىن ىسكە اسىرۋ جالعاسۋدا.
بۇل تۋرالى جوبانىڭ جەتەكشىسى اەجان كەڭەسوۆ وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا مالىمدەدى، دەپ حابارلايدى aqshamnews.kz.
«ءبىزدىڭ ماقساتىمىز - ءاربىر جاس ادامنىڭ ءوز الەۋەتىن اشۋعا، قالا ومىرىنە قاتىسۋعا جانە قوعامنىڭ قولداۋىن سەزىنۋگە جاعداي جاساۋ»، - دەپ اتاپ ءوتتى اكەجان كەڭەسوۆ.
ونىڭ ايتۋىنشا، جوبا بىردەن بىرنەشە باعىتتى قامتيدى. ولاردىڭ ىشىندە-الەۋمەتتىك ينتەگراسيانى دامىتۋ: ءار ءتۇرلى الەۋمەتتىك جانە ەتنيكالىق توپتاردىڭ جاستارى ديالوگ پەن بىرلەسكەن باستامالارعا قاتىسادى، بۇل تولەرانتتى جانە ۇيىمشىل قوعامنىڭ قالىپتاسۋىنا ىقپال ەتەدى.
سپيكەر كاسىپتىك جانە ومىرلىك وقىتۋعا ەرەكشە كوڭىل بولىنەتىنىن اتاپ ءوتتى. جاستارعا ەڭبەك نارىعىنا بەيىمدەلۋگە كومەكتەسەتىن ارنايى ءبىلىم بەرۋ باعدارلامالارى ازىرلەنۋدە.
سونداي-اق، جوبا اياسىندا پسيحولوگيالىق قولداۋ كورسەتىلەدى.
«ءبىز جاستارعا سەنىمدىلىكتى سەزىنۋگە، كوشباسشىلىق قاسيەتتەردى دامىتۋعا جانە قوعامدىق جانە ۆولونتەرلىك قوزعالىستارعا قوسىلۋعا كومەكتەسەمىز»، - دەدى جوبا جەتەكشىسى.
ونىڭ ايتۋىنشا، جوبا مەملەكەتتىك قۇرىلىمدارمەن، ۇكىمەتتىك ەمەس ۇيىمدارمەن جانە بيزنەس وكىلدەرىمەن سەرىكتەستىكتە جۇزەگە اسىرىلۋدا، بۇل تۇراقتى ءارى تاجىريبەگە نەگىزدەلگەن قولداۋدى قامتاماسىز ەتەدى.