ارالدىڭ ۇلتانىنان سۋ تابىلدى

تىرشىلىك كوزى القاپتى سۋعارۋعا جارامدى بولىپ شىقتى.

ارال تەڭىزىنىڭ تۇبىنەن سۋ تابىلدى، دەپ حابارلايدى Almaty-akshamy.kz

ساتبايەۆ ۋنيۆەرسيتەتىنىڭ گيدرولوگ عالىمدارى تەڭىزدىڭ استىنداعى تۇششى سۋدى تاۋىپ، دالەلدەپ بەرىپ وتىر.

«حابار» ارناسىنىڭ حابارلاۋىنشا، ۇڭعىلاۋ جۇمىستارى 500 مەتر تەرەڭدىكتە جۇرگىزىلگەن. ناتيجەسىندە تەڭىزدىڭ قۇرعاپ كەتكەن بولىگىندە جەر استى سۋى تابىلدى.

بۇل جوبا اسىرەسە، ارالدىڭ وڭتۇستىك جاعىنىڭ ەكولوگياسىن قالپىنا كەلتىرۋگە ءتيىمدى. اتاپ ايتقاندا، سەكسەۋىل القابىن كوبەيتىپ، كوگالداندىرۋعا سەپتىگىن تيگىزەدى. سونداي-اق ول جەردەن اڭ-جانۋاردىڭ ءبارى سۋ ىشە الادى. قۇمنىڭ اراسىندا پايدا بولاتىن وازيس ايماقتىڭ كليماتىنا وڭ اسەر ەتپەك. ءسويتىپ ەكوجۇيەنى رەتتەيدى.

عالىمداردىڭ ايتۋىنشا، بۇل اۋىل شارۋاشىلىق ماقساتىندا ەكوجۇيەنى قالپىنا كەلتىرۋگە ارنالعان العاشقى جوبا. ىسكە اسىپ جاتسا، وڭ وزگەرىس اكەلەدى. ءتۋريزمنىڭ دامۋىنا ۇلەس قوسادى.

"500 مەتر تەرەڭدىكتە بۇرعىلانعان ۇڭعىمادان سەكۋندىنا 8 ليتردەن جەر استى سۋى شىعادى. سۋدىڭ تۇزدىلىعى ءبىر ليترگە 3،5 گرامم مولشەرىندە. ناتيجەسىندە سولاردى قولدانۋ ارقىلى ارالدىڭ قۇمدارىندا وسىمدىكتەر وسىرۋگە بولادى"، - دەيدى گيدروگەولوگ عالىم دۋلات قاليتوۆ.