بيىل ۆەگەتاسيا كەزىندە ارال تەڭىزىنە 977 ملن تەكشە مەتر سۋ جىبەرىلگەن.
سوڭعى 5 جىلدا العاش رەت ارالعا سۋ جىبەرۋ جوسپارى 100 پايىزعا جۋىق ورىندالدى، دەپ حابارلايدى aqshamnews.kz
سۋ رەسۋرستارى جانە يرريگاسيا مينيسترلىگىنىڭ مالىمەتىنشە، بيىل ۆەگەتاسيا كەزىندە ارال تەڭىزىنە 977 ملن تەكشە مەتر سۋ جىبەرىلگەن. بۇل جوسپارلانعان كولەمنىڭ 98 پايىزى.
ايتا كەتۋ كەرەك، سوڭعى بىرنەشە جىلدا سۋارۋ ماۋسىمىندا تەڭىزگە 350-400 ملن تەكشە مەتردىڭ اينالاسىندا عانا سۋ جىبەرىلىپ كەلگەن بولاتىن. ال جىل باسىنان بەرى ارالعا 2 ملرد تەكشە مەتردەن استام سۋ قۇيىلدى. مينيسترلىك جىل سوڭىنا دەيىن تاعى 500 ملن تەكشە مەتر سۋ جىبەرۋدى جوسپارلاپ وتىر.
مەملەكەتارالىق سۋ شارۋاشىلىعى ۇيلەستىرۋ كوميسسياسىنىڭ 86-شى وتىرىسىندا سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ سۋارۋ ماۋسىمى كەزىندە ارالعا 997 ملن تەكشە مەتر سۋ جىبەرۋ جونىندە كەلىسىمگە كەلگەن بولاتىن. وسىنىڭ ناتيجەسىندە بۇگىنگى تاڭدا سولتۇستىك ارال تەڭىزىنىڭ سۋ كولەمى 22 ملرد تەكشە مەترگە جەتتى. سالىستىرۋ ءۇشىن، تەڭىزگە وسىعان دەيىن ۆەگەتاسيا كەزىندە سەكۋندىنا 7-10 تەكشە مەتر سۋ جىبەرىلگەن بولسا، بيىل سەكۋندىنا 60-70 تەكشە مەتر سۋ جىبەرىلدى. كورسەتكىش 10 ەسە ارتىق، – دەدى ارال-سىرداريا باسسەيندىك ينسپەكسياسى باسشىسىنىڭ ورىنباسارى زەينۋللا قازتوعانوۆ.