قازاقستان ۇكىمەتىنىڭ مۇشەلەرى گەرمان قوعامىنىڭ وڭىرلىك جوباسىنىڭ جەتەكشىسىمەن كەزدەستى.
قازاقستان جانە گەرمانيا ماماندارى كەزدەسىپ، ارال ماسەلەلەرىن تالقىلادى، دەپ حابارلايدى Almaty-akshamy.kz.
«قازاقستاننىڭ ەكولوگيا، گەولوگيا جانە تابيعي رەسۋرستار ۆيسە-مينيسترى ءاليا شالابەكوۆا «ارال ءوڭىرىنىڭ ەكولوگيالىق باعدارلانعان وڭىرلىك دامۋى» حالىقارالىق ىنتىماقتاستىق جونىندەگى گەرمان قوعامىنىڭ (GIZ) وڭىرلىك جوباسىنىڭ جەتەكشىسى پاۋل شۋماحەرمەن كەزدەستى»، – دەلىنگەن اتالمىش مينيسترلىكتىڭ باسپا ءسوز قىزمەتىنىڭ حابارلاماسىندا.
پاۋل شۋماحەر ۆيسە-مينيستردى ارال وڭىرىندەگى ەكولوگيالىق جاعدايدى جاقسارتۋ بويىنشا ءبىرقاتار ءىس-شارالار ىسكە اسىرىلىپ جاتقان اتالعان وڭىرلىك جوبانىڭ اعىمداعى جىلدىڭ باسىندا باستالعانى تۋرالى حاباردار ەتتى.
ءوز كەزەگىندە ءاليا شالابەكوۆا مينيسترلىكتىڭ GIZ-مەن ءتۇرلى جوبالار بويىنشا جەمىستى ىنتىماقتاستىعىن اتاپ ءوتىپ، ەكولوگيا جانە قورشاعان ورتانى قورعاۋ سالاسىندا تەحنيكالىق كومەك كورسەتكەنى ءۇشىن العىسىن ءبىلدىردى.
رەسمي دەرەك بويىنشا، كەزدەسۋ بارىسىندا تاراپتار كوگالداندىرۋ، لاندشافتقا كەشەندى مونيتورينگ جۇرگىزۋ جانە ارال تەڭىزىنىڭ قۇرعاعان تابانىن كارتوگرافيالاۋ سالاسىنداعى ىنتىماقتاستىقتىڭ باسىم باعىتتارىن، سونداي-اق كليماتتىڭ وزگەرۋىنە بەيىمدەلۋ، بالىق شارۋاشىلىعىن دامىتۋ، تابيعاتتى قورعاۋ ءىس-شارالارىنا جەرگىلىكتى حالىقتى تارتۋ ماسەلەلەرىن تالقىلادى.
كەزدەسۋ قورىتىندىسى بويىنشا تاراپتار ىنتىماقتاستىقتى ودان ءارى نىعايتۋعا جانە GIZ جوباسىنا قازاقستاندا جان-جاقتى قولداۋ كورسەتۋگە دايىن ەكەندىكتەرىن ءبىلدىردى.
انىقتاما «ارال ءوڭىرىنىڭ ەكولوگيالىق باعدارلانعان وڭىرلىك دامۋى» وڭىرلىك جوباسى گەرمانيانىڭ ەكونوميكالىق ىنتىماقتاستىق جانە دامۋ فەدەرالدىق مينيسترلىگىنىڭ تاپسىرماسى بويىنشا جۇزەگە اسىرىلادى جانە ونى حالىقارالىق ىنتىماقتاستىق جونىندەگى گەرمانيا قوعامى (GIZ) ىسكە اسىرادى. جوبا ارال ءوڭىرىنىڭ ەكولوگيالىق ورنىقتى ترانسشەكارالىق ەكونوميكالىق دامۋىن قامتاماسىز ەتۋدە قازاقستان مەن وزبەكستان ۇكىمەتتەرىنە قولداۋ كورسەتەدى.