قازىرگى ۋاقىتتا قىزىلوردا وبلىسى اۋماعىنان 900 تەكشە مەتردەي سۋ وتە باستاعان. ارال ماڭىنداعى قامباش جانە اقشاتاۋ كولدەر جۇيەسى قايتا قالپىنا كەلدى.
وتكەن جىلى بۇل جەرلەردى قۋاڭشىلىق جايلاعان. ەندى اقلاق سۋ توسپاسى ارقىلى رەتتەلەتىن توعىز كول جۇيەسىن سۋلاندىرۋ كوزدەلگەن. ول ءۇشىن ءتيىستى شارالار قولعا الىندى. بۇگىندە سىرداريا وزەنىنە دە مول سۋ تۇسە باستاعان، دەپ حابارلايدى Almaty-akshamy.kz
«ساراتس-1» جوباسى ىسكە اسقاننان كەيىن تەڭىز دەڭگەيىن 42 مەترگە دەيىن كوتەرۋگە مۇمكىندىك تۋدى. الايدا وتكەن جىلى سىرداريا وزەنى ارقىلى كوك ارالعا ءتيىستى كولەمدەگى سۋ تۇسكەن جوق. سوعان بايلانىستى ءقازىر تەڭىز دەڭگەيى 80 سم تومەن. دەگەنمەن وزەن باستاۋىنداعى قار مەن مۇز كۇرت ەرىپ، جاۋان-شاشىننىڭ كوبەيۋىنە بايلانىستى سوڭعى كۇندەرى قىزىلوردا وبلىسى اۋماعىنا مول سۋ كەلە باستاعان.
«15 ساۋىرگە دەيىن وسى سۋ وبلىس كولەمىنەن اعىپ ءوتىپ، سولتۇستىك ارال تەڭىزىنە بارادى دەپ وتىرمىز. ونىڭ ءوزى وسىنداي جاۋىن-شاشىننىڭ، وزەندەگى سۋدىڭ ەسەبىنەن بولىپ وتىر. ەگىن باستالعانعا دەيىن سولتۇستىك ارال تەڭىزىنە بەلگىلى ءبىر مولشەردە سۋ كولەمى بەرىلەدى»، - دەيدى ارال-سىرداريا باسسەيندىك ينسپەكسياسىنىڭ باسشىسى سەيىلبەك نۇرىمبەتوۆ.
وتكەن جىلى ارال اۋدانىنداعى بۇرماقۇلاق بوگەتىن بەكىتكەننەن كەيىن، قامباش جانە اقشاتاۋ كولدەر جۇيەسى بۇرىنعى قالپىنا كەلدى. بىرەر كۇن بۇرىن اقالاق سۋ توسپاسى دا جابىلدى. وسىلايشا، قاراتەرەڭ ەلدى مەكەنى ماڭىنداعى كولدەردى سۋلاندىرۋ جوسپارلانعان.
«بۇگىنگى كۇنگە سۋدىڭ دەڭگەيى 51،45-كە جەتىپ وتىر. ءبىزدىڭ جوسپار سول دەڭگەيدى 53-كە جەتكىزۋ. ءقازىر سۋ تورابىنىڭ الدىنا سۋ جيناقتالىپ جاتىر. بىزدە سەگىز كانال بار، سولار ارقىلى ءىرىلى-ۇساقتى توعىز كولگە سۋ بەرىلەدى»، - دەيدى «قازسۋشار» رمك قىزىلوردا فيليالىنىڭ ءبولىم باسشىسى ايدوس اسانبايەۆ.
مامانداردىڭ ايتۋىنشا، ەگىن ناۋقانى باستالعانعا دەيىن وڭىردەگى سۋ ارنالارىن تولىپ، شابىندىقتاردى نارلەندىرۋگە ۇلكەن سەپتىگىن تيگىزەدى.