سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ اراب ۇيلەستىرۋ توبىنىڭ وكىلدەرى – ساۋد دامۋ قورىنىڭ (SFD) باس ديرەكتورى سۇلتان ابدۋلراحمان ءال-مارشادي جانە وپەك قورىنىڭ پرەزيدەنتى، دوكتور ابدۋلحاميد الحاليفامەن ەكىجاقتى كەزدەسۋ وتكىزدى، دەپ حابارلايدى aqshamnews.kz سالا مينيسترلىگىنە سىلتەمە جاساپ.
نۇرجان نۇرجىگىتوۆ ىنتىماقتاستىق مۇمكىندىكتەرى مەن جۇزەگە اسىرۋعا بولاتىن جوبالاردى تالقىلادى. اتاپ ايتقاندا، شەتەلدىك ينۆەستورلارعا سۋ سالاسىن دامىتۋدىڭ 2024-2028 جىلدارعا ارنالعان كەشەندى جوسپارىندا كوزدەلگەن سۋ شارۋاشىلىعى نىساندارىن سالۋ جانە رەكونسترۋكسيالاۋ جونىندەگى جۇمىستار تۋرالى ايتىپ بەردى.
مينيستر ينۆەستورلارعا سۋ سالاسىن، جەراستى سۋلارىن اۆتوماتتاندىرۋ جانە سيفرلاندىرۋ، توپتىق سۋ قۇبىرلارىن قايتا جاڭعىرتۋ جانە مامان دايارلاۋ سالاسىنداعى ىنتىماقتاستىق مۇمكىندىكتەرىن دە قاراستىرۋدى ۇسىندى. سونىمەن قاتار، تاراپتار قازاق سۋ شارۋاشىلىعى عىلىمي-زەرتتەۋ ينستيتۋتىنىڭ، سۋ رەسۋرستارى اقپاراتتىق-تالداۋ ورتالىعىنىڭ جانە ۇلتتىق گيدروگەولوگيالىق قىزمەتتىڭ ماتەريالدىق-تەحنيكالىق بازاسىن جاقسارتۋ ماسەلەسىن تالقىلادى.
شەتەلدىك ينۆەستورلار ءوز كەزەگىندە مينيسترلىكتىڭ جوبالارىنا قاتىسۋعا دايىن ەكەندىكتەرىن ءبىلدىردى. تاراپتار تالقىلاۋدى بىرلەسكەن جۇمىس توپتارى شەڭبەرىندە جالعاستىرۋعا كەلىستى.
«ءبىز يسلام دامۋ بانكىمەن كەلىسسوزدەر حاتتاماسىنا قول قويدىق. وسى ارقىلى قازاقستاننىڭ سۋ سالاسىنا قوماقتى ينۆەستيسيا اكەلەتىن كەلىسىمدەردى ازىرلەۋ جانە وعان قول قويۋعا مۇمكىندىك بەرەتىن كەلەسى كەزەڭگە وتتىك. مەملەكەت باسشىسى ەلىمىزدىڭ سۋ سالاسىنا ينۆەستيسيا تارتۋدىڭ ماڭىزىن اتاپ ءوتتى، سوندىقتان ءبىز حالىقارالىق قارجى ينستيتۋتتارىمەن بەلسەندى كەلىسسوز جۇرگىزىپ جاتىرمىز»، – دەدى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.