قازاق ادەبيەتىنىڭ اسا كورنەكتى وكىلى، مەملەكەتتىك سىيلىقتىڭ لاۋرەاتى، «پاراسات» جانە «قۇرمەت» وردەندەرىنىڭ يەگەرى كۇلاش احمەتوۆا 79 جاسىندا دۇنيە سالدى.
قايعىلى حاباردى مادەنيەت جانە اقپارات مينيسترلىگى جەتكىزدى، -دەپ حابارلايدى Aqshamnews.kz
مينيسترلىك مارقۇمنىڭ وتباسى مەن تۋعان-تۋىستارىنا، ادەبي قاۋىمعا جانە بارشا قازاقستاندىقتارعا كوڭىل ايتاتىنىن جەتكىزدى.
كۇلاش احمەتوۆا قازاق پوەزياسىندا نازىك ليريكاسىمەن، ازاماتتىق اسقاق ۇنىمەن جانە ۇلتتىق رۋحانياتقا قوسقان ولشەۋسىز ۇلەسىمەن ەرەكشەلەنگەن. ونىڭ «اق گۇلىم مەنىڭ»، «سەن مەنىڭ باقىتىمسىڭ»، «بۇلاقتاعى جۇلدىزدار»، «مەيىرىم»، «جاپىراق – جازدىڭ جۇرەگى» سياقتى جىر جيناقتارى بىرنەشە بۋىن وقىرمانداردىڭ جۇرەگىندە ءىز قالدىرعان.
ءومىربايانى
كۇلاش ءدىلدا قىزى احمەتوۆا 1946 جىلى 25 ساۋىردە قىرعىزستان تالاس اۋدانى كيروۆ اۋىلىندا دۇنيەگە كەلگەن.
جامبىل وبلىسى تالاس اۋدانىنداعى ءۇشارال ورتا مەكتەبىن بىتىرگەن
1961 جىلى جامبىل مەديسينالىق ۋچيليششەسىن مەيىربيكە ماماندىعى بويىنشا بىتىرگەن
1973 جىلى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىن جۋرناليست ماماندىعى بويىنشا بىتىرگەن
ءۇشارال مەدپۋنكتىندە مەڭگەرۋشى، تالاس اۋداندىق «لەنين جولى»، 1973-1977 جىلدارى رەسپۋبليكالىق «قازاقستان پيونەرى» (قازىرگى «ۇلان») گازەتتەرىندە ادەبي قىزمەتكەر، ءبولىم مەڭگەرۋشىسى، 1977-1980 جىلدارى «جالىن» باسپاسىنىڭ پوەزيا بولىمىندە رەداكتور بولدى.
«سەن مەنىڭ باقىتىمسىڭ» اتتى كىتابى ءۇشىن اقىن قازاقستان جاستار وداعى سىيلىعىنىڭ لاۋرەاتى بولدى.
ولەڭدەرى ورىس، ۋكراين جانە تۇركى حالىقتارىنىڭ تىلدەرىنە اۋدارىلعان، مەكتەپ وقۋلىقتارىنا ەنگەن. تاۋەلسىزدىكتىڭ ون جىلدىعىنا، استانانىڭ ون جىلدىعىنا ارنالعان رەسپۋبليكالىق جازبا اقىندار ءمۇشايراسىنىڭ باس جۇلدەگەرى.
ماراپاتتارى
1978 جىلى «سەن مەنىڭ باقىتىمسىڭ» اتتى كىتابى ءۇشىن قازاقستان لەنين كومسومولى سىيلىعى بەرىلدى
2006 جىلى «قۇت» كىتابى ءۇشىن قازاقستان رەسپۋبليكاسىنىڭ مەملەكەتتىك سىيلىعىنىڭ لاۋرەاتى اتاندى.
«بولاشاق» پوەماسى ءۇشىن ك.سيمونوۆ اتىنداعى حالىقارالىق سىيلىقتىڭ يەگەرى
2006 جىلى - قۇرمەت وردەنى
2017 جىلى - پاراسات وردەنى
جامبىل وبلىسىنىڭ قۇرمەتتى ازاماتى
ق ر كوپتەگەن مەرەكەلىك مەدالدارىمەن جانە پرەزيدەنتتىڭ العىس حاتتارىمەن ماراپاتتالعان
ق ر تۇڭعىش پرەزيدەنتى - ەلباسى ن.ءا.نازاربايەۆتىڭ ادەبيەت سالاسىنداعى مەملەكەتتىك جانە پرەزيدەنتتىك ستەپەنديالارىنىڭ يەگەرى.