اقتوبەدە قىلمىسكەر كولونيادان قاشىپ كەتكەن

اناسى ناۋقاس ەكەنىن بىلگەن

اقتوبەدە قىلمىسكەر كولونيادان ناۋقاس اناسىنا قاشىپ كەتكەن، - دەپ حابارلايدى Almaty-akshamy.kz Tengrinews.kz-كە سىلتەمە جاساپ. 

"دياپازون" باسىلىمىنىڭ مالىمەتىنشە، 36 جاستاعى اقتوبەلىك اۋىر قىلمىسى ءۇشىن 8 جىلعا سوتتالعان، ول جازاسىن قونىس كولونياسىندا وتەپ جاتقان. وندا قىلمىسكەر قاراۋىلسىز ءجۇرىپ، جۇمىسقا بارىپ، كەشكە ورالاتىن. ءبىراق ءبىر كۇنى ول كولونيادان قاشىپ كەتىپتى. 

قىلمىسكەر اپكەسىنىڭ اۋلىندا ۇستالدى. تۇرمەدەن قاشقانى ءۇشىن ۇستىنەن قىلمىستىق ءىس قوزعالعان.

سوتتا ەر ادام اناسى اۋىر ناۋقاس ەكەنىن ايتتى. اناسى شۇبارقۇدىق اۋلىندا تۇرادى ەكەن، ول كولونيا باسشىلىعىنان اناسىنا بارىپ-قايتۋعا مۇمكىندىك بەرۋىن وتىنگەن، ءبىراق ءوتىنىشىن قابىلداماعان. اقىرىندا قىلمىسكەر كولونيادان قاشۋعا بەل بۋعان. اقتوبەدە ءبىر تاۋلىككە پاتەر جالداپ، كەيىن اۋىلعا اناسىنا بارعانىن، ارتىنشا اپكەسىنە بارعان كەزدە ۇستالعانىن ايتتى.

باسىلىم مالىمەتىنشە، ول بۇرىنعى قىلمىسى ءۇشىن جازاسىنىڭ باسىم بولىگىن وتەگەن، تەك 4 ايى قالىپتى. ءبىراق سوت قاشىپ كەتكەنى ءۇشىن ونى 1 جىلعا باس بوستاندىعىنان ايىردى. قونىس كولونياسىنان ول ەڭ جوعارى قاۋىپسىزدىكتەگى مەكەمەگە اۋىستىرىلادى.