اقتاۋدا پالما اعاشى جايقالىپ تۇر

اقتاۋ ورتالىعىنداعى جاسىل وازيس

ەكسپەريمەنتتىك بوتانيكالىق باقتىڭ ماماندارى سۋبتروپيكالىق وسىمدىكتى وتىرعىزدى. شەتەلدەن اكەلىنگەن پالمالاردىڭ ءۇش ءتۇرى باقتىڭ ەرەكشە كوركىن اشۋدا. ەندى قازاقستاندىق عالىمدار وسى ەكزوتيكالىق اعاشتاردى وڭىرگە جەرسىندىرۋ جۇمىستارىمەن اينالىسىپ جاتىر، دەپ حابارلايدى Almaty-akshamy.kz 

ماڭعىستاۋدىڭ كليماتتىق كورسەتكىشتەرىن زەرتتەۋ ناتيجەلەرى بويىنشا، وبلىستا سوڭعى 10 جىل ىشىندە 280 كۇن بويى جىلى تەمپەراتۋرا ساقتالعان. مامانداردى مۇنداي تەرمومەتر كورسەتكىشى قۋانتادى. ءقازىر بوتانيكالىق باقتىڭ قىزمەتكەرلەرى اعاش ءدىڭىن ارنايى كەنەپ ماتامەن وراپ، 1،5 مەترلىك پالمالاردى قىسقا دايىنداپ جاتىر.

ايتا كەتەيىك، بۇل تروپيكالىق اعاشتار ايازعا ءتوزىمدى بولىپ كەلەدى. ەكزوتيكالىق وسىمدىكتەر مينۋس 10 گرادۋسقا دەيىنگى اۋا تەمپەراتۋراسىنا توتەپ بەرە الادى.

«العاشقىدا 1-2 اي تەمپەراتۋرالىق رەجيمگە بەيىمدەلسىن دەگەن ماقساتتا ءوزىنىڭ ىدىسىندا ۇستادىق. قىركۇيەك ايىنان باستاپ ەكتىك. قاراشا ايىنىڭ اياعىندا قىسقا دايىندايمىز»، - بوتانيكا باعىنىڭ ديرەكتورى ءاقجۇنىس يمانبايەۆا. 

«يتالياندىق البا، تروپيكالىق ليمون، اناناس، پالما، سۋكلەنت وسىمدىكتەرىنىڭ تۇرلەرىن ستۋدەنتتەرمەن كىشى عىلىم اكادەمياسىندا ءوسىرىپ، وسى تابيعاتقا جەرسىندىرەمىز. ءزىمبىر، ليمون سياقتى وسىمدىكتەردى ماڭعىستاۋدا وسپەيدى دەۋ دۇرىس ەمەس. ماراكۋييا وسىمدىگىن جۇزىممەن الماستىرۋعا بولادى»، - دەيدى جاراتىلىستانۋ عىلىمدارى كافەدراسىنىڭ مەڭگەرۋشىسى، پروفەسسور لاتيپا قوجامجاروۆا.