يندۋستريا جانە ينفراقۇرىلىمدىق دامۋ مينيسترلىگى «اقتاۋ تەڭىز ساۋدا پورتىنا حالىقارالىق مارتەبە بەرۋ تۋرالى» ۇكىمەت قاۋلىسىنىڭ جوباسىن ازىرلەدى، دەپ حابارلايدى almaty-akshamy.kz قازاقپاراتقا سىلتەمە جاساپ.
«ق ر ۇكىمەتى قاۋلى ەتەدى:
1. اقتاۋ تەڭىز ساۋدا پورتىنا حالىقارالىق ماڭىزى بار تەڭىز پورتى مارتەبەسىن بەرۋ.
2. «اقتاۋ تەڭىز ساۋدا پورتى» ۇلتتىق كومپانياسى» اكسيونەرلىك قوعامى «اقتاۋ حالىقارالىق تەڭىز ساۋدا پورتى» ۇلتتىق كومپانياسى» اكسيونەرلىك قوعامى بولىپ قايتا اتالسىن.
3. وسى قاۋلىنىڭ قوسىمشاسىنا سايكەس قازاقستان رەسپۋبليكاسى ۇكىمەتىنىڭ كەيبىر شەشىمدەرىنە وزگەرىستەر ەنگىزىلسىن»، - دەلىنگەن «اشىق» نقا پورتالىندا جاريالانعان قۇجاتتا.
مينيسترلىك دەرەگىنشە، بۇل باستاما ەلىمىزدىڭ كولىك-ترانزيت الەۋەتىن دامىتۋ ماقساتىندا قولعا الىندى.
«جوبا مەملەكەت باسشىسىنىڭ جاڭا گەوساياسي جاعدايلاردا قازاقستان رەسپۋبليكاسىنىڭ كولىك-ترانزيت الەۋەتىن دامىتۋ ماسەلەسى تۋرالى 2022 جىلعى 5 شىلدەدەگى كەڭەستىڭ قورىتىندىسى بويىنشا بەرگەن تاپسىرماسىنا سايكەس ازىرلەنگەن. وسى جوبانى ىسكە اسىرۋ رەسپۋبليكالىق بيۋدجەتتەن قاراجات ءبولۋدى تالاپ ەتپەيدى»، - دەپ ۇكىمەت قاۋلىسىنا يندۋستريا جانە ينفروقۇرىلىمدىق دامۋ مينيسترلىگى تۇسىندىرمە بەرگەن.
قۇجات 27 ساۋىرگە دەيىن كوپشىلىك تالقىلاۋدا بولادى. كەيىن قول قويۋ ءۇشىن پرەمەر-مينيسترگە جولدانادى.