اقش-تان كەلگەن حالىقارالىق باقىلاۋشى الماتىداعى التى سايلاۋ ۋچاسكەسىن ارالادى

الماتى قالاسى بويىنشا ق ر پرەزيدەنتى سايلاۋىنان حابار تاراتۋ جونىندەگى باسپا ءسوز ورتالىعىنىڭ اقپاراتى. 

اقش-تان كەلگەن بايقاۋشى الماتىداعى التى سايلاۋ ۋچاسكەسىن ءۇش ساعات ارالادى، دەپ حابارلايدى Almaty-akshamy.kz.

 «Wikistrat Global Consultancy» اعا عىلىمي قىزمەتكەرى، تاۋەلسىز باقىلاۋشىلار ميسسياسىنىڭ اقش اتىنان مۇشەسى ۋيليام ۆايس باسپا ءسوز كونفەرەنسياسىنا قاتىسىپ، تاڭەرتەڭگى اۋا رايىنىڭ قولايسىزدىعىنا قاراماستان، الماتىلىقتاردىڭ داۋىس بەرۋگە بارعانىن اتاپ ءوتتى. 

كۇن اياقتالعانشا حالىقارالىق باقىلاۋشى مەگاپوليستىڭ ءار ءتۇرلى بولىگىندە ورنالاسقان 20 ۋچاسكەگە بارۋدى جوسپارلاپ وتىر. 
 
«سايلاۋ ۋچاسكەلەرىندە مەن ءارتۇرلى جاستاعى ادامداردى كوردىم، جاستار دا بار، ۇلكەن كىسىلەر دە بار. ەشقانداي  نارازىلىلىق بولعان جوق، مەن ءوز كورگەنىمە ريزا بولدىم»، - دەپ اتاپ ءوتتى امەريكالىق.

ريچارد ۋيليام ۆايس فرانسيا مەن رەسەيدەن كوپتەگەن جەرگىلىكتى جانە شەتەلدىك باقىلاۋشىلاردى كورگەنىن ايتتى.

باسپا ءسوز ورتالىعىنىڭ سپيكەرى قازاقستاندا اقش-قا قاراعاندا سايلاۋعا بارىنشا جاۋاپكەرشىلىكپەن قارايتىنىن، باستى ايىرماشىلىقتاردىڭ ءبىرى وسى بولسا كەرەك دەپ اتاپ ءوتتى. اقش-تا سايلاۋدا حالقىنىڭ جارتىسىنان ازى داۋىس بەرەدى. سونداي-اق اقش-تا  باقىلاۋشىلارعا سايلاۋ ۋچاسكەلەرىنىڭ ىشىندە بولۋعا تىيىم سالىنادى، ولار ونى سىرتتان باقىلايدى.