اقپاراتتىق ورتالىققا ءوتىنىش بىلدىرەتىن قانداستار كوبەيىپ كەلەدى

2020 جىلى 5065 ادام، 2021 جىلدىڭ 5 ايىندا 2177 قانداس ءوتىنىش بىلدىرگەن.

«قانداستاردى اقپاراتتىق قولداۋ ورتالىعى» ۇيىمىنا حابارلاساتىن كانداستار سانى ارتىپ كەلەدى، دەپ حابارلايدى Almaty-akshamy.kz.

ورتالىق قىزمەتى «بايلانىس ورتالىعىنان» جانە  وبلىستارداعى «فرونت-كەڭسەلەردەن» تۇرادى. قانداستارىمىز «وتانداستار قورى» ءبىرىڭعاي اقپاراتتىق ورتالىعىنىڭ 1404 تەلەفون نومەرىنە تەگىن قوڭىراۋ شالىپ، كەڭەس الا الادى.

قازاقستانعا كوشىپ كەلگەن قانداستاردىڭ بەيىمدەلۋىنە، جاردەمدەسۋ جانە شەتەلدەگى وتانداستارعا اقپاراتتىق-كونسۋلتاسيالىق قىزمەت كورسەتۋ ماقساتىندا 2019 جىلدان باستاپ «قانداستاردى اقپاراتتىق قولداۋ ورتالىعى» جۇمىس ىستەپ كەلەدى.

«2019-2021 جىلدىڭ ماۋسىمىنا دەيىنگى ارالىقتا ورتالىققا ەلىمىزگە قونىس اۋدارعان قانداستار مەن شەتەلدە تۇراتىن ەتنيكالىق قازاقتاردان بارلىعى 10690 ءوتىنىش كەلىپ ءتۇستى»، – دەدى «وتانداستار قورى» كەاق ۆيسە-پرەزيدەنتى ماعاۋيا سارباسوۆ 12 شىلدە كۇنى «شەتەلدە تۇراتىن قانداستارمەن مادەني-گۋمانيتارلىق بايلانىستاردى نىعايتۋ تۋرالى» تاقىرىبىندا بريفينگ بارىسىندا.

مامانداردىڭ ايتۋىنشا،2019 جىلى ورتالىققا حابارلاسىپ، ءوتىنىش بىلدىرگەندەردىڭ سانى  – 3448 بولعان، 2020 جىلى بۇل كورسەتكىش 5065 جەتتى، ال 2021 جىلدىڭ 5 ايىندا – 2177 ادام ءوتىنىش بىلدىرگەن.