مەملەكەت باسشىسىنىڭ جانە شەتەلدىك قوناقتاردىڭ قاتىسۋىمەن وسى اپتادا ماڭىزدى ءىس-شارالار وتەدى، دەپ حابارلايدى aqshamnews.kz
28-29 مامىر كۇندەرى قازاقستانعا رۋاندا پرەزيدەنتى پول كاگامە رەسمي ساپارمەن كەلەدى. ساپار اياسىندا ەكىجاقتى ىنتىماقتاستىقتى دامىتۋ پەرسپەكتيۆاسى تالقىلانىپ، ءبىرقاتار قۇجاتقا قول قويىلادى.
28 مامىردا گەرمانيا فەدەراتيۆتىك رەسپۋبليكاسى بۋندەسراتىنىڭ ءتوراعاسى انكە رەلينگەرمەن كەزدەسۋ وتەدى.
28-29 مامىر كۇندەرى سولتۇستىك ماكەدونيا پرەزيدەنتى گوردانا سيليانوۆسكايا-داۆكوۆا جۇمىس ساپارىمەن كەلەدى.
28-29 مامىردا استاناعا حورۆاتيا پرەمەر-مينيسترى اندرەي پلەنكوۆيچ جۇمىس ساپارىمەن كەلەدى.
29 مامىر كۇنى پرەزيدەنت قاسىم-جومارت توقايەۆ استانا حالىقارالىق فورۋمىنا (AIF) قاتىسادى جانە رەسمي دەلەگاسيا جەتەكشىلەرىمەن، سونداي-اق حالىقارالىق ۇيىمدار مەن كومپانيالار باسشىلارىمەن ءبىرقاتار كەزدەسۋ وتكىزەدى.
30 مامىردا ەلىمىزگە يتاليا پرەمەر-مينيسترى دجوردجا مەلوني رەسمي ساپارمەن كەلەدى. سول كۇنى ايماقتاعى مەملەكەتتەر باسشىلارىنىڭ قاتىسۋىمەن ءبىرىنشى «ورتالىق ازيا – يتاليا» ءسامميتى وتەدى.