اقمولا وبلىسىندا پروكۋراتۋرامەن قايتارىلعان اكتيۆتەر اۋىل تۇرعىندارىن اۋىز سۋمەن قامتاماسىز ەتۋگە باعىتتالدى، - دەپ حابارلايدى Aqshamnes.kz ءتىلشىسى.
اقمولا وبلىسى زەرەندى اۋدانىنىڭ اقادىر اۋىلىندا پروكۋراتۋرا ورگاندارى قايتارعان اكتيۆتەر اۋىل تۇرعىندارىن اۋىز سۋمەن قامتاماسىز ەتۋگە باعىتتالدى.
بۇل قاراجات ەسەبىنەن ۇزىندىعى 12 شاقىرىم بولاتىن سۋ قۇبىرى جەلىلەرى مەن سۋ الۋ قۇرىلىستارىنىڭ قۇرىلىسى جۇرگىزىلىپ جاتىر.
ءقازىر اۋىل تۇرعىندارى اۋىز سۋدى پايدالانۋدا شەكتەۋلەرگە تاپ بولىپ وتىر، نەگىزگى سۋ كوزى رەتىندە كولونكالار مەن سۋ تاراتۋ پۋنكتتەرى قىزمەت ەتىپ جاتىر. سۋ قۇبىرى پايدالانۋعا بەرىلگەننەن كەيىن 500-دەن اسا تۇرعىن ورتالىقتاندىرىلعان اۋىز سۋمەن قامتىلادى.
مەردىگەر ۇيىم جۇمىستىڭ ساپاسىن قامتاماسىز ەتۋ مەن بەلگىلەنگەن مەرزىمدەردى قاتاڭ ساقتاۋعا باسا نازار اۋدارىپ وتىر.
قۇرىلىس بارىسى مەن قاراجاتتىڭ ماقساتتى جۇمسالۋى وبلىس پروكۋراتۋراسىنىڭ تۇراقتى باقىلاۋىندا.