استانا - پەتروپاۆل تاسجولىندا Kia K5 جانە Volkswagen Passat ماركالى ەكى جەڭىل كولىك سوقتىعىسىپ، ەكى ادام قازا تاپتى، تاعى تورتەۋى جاراقات الدى، - دەپ حابارلايدى aqshamnews.kz.
بۇل تۋرالى اقمولا وبلىستىق پوليسيا دەپارتامەنتىنىڭ باسپا ءسوز قىزمەتى وكىلدەرى 16 تامىزدا مالىمدەدى.
جول اپاتى كوكشەتاۋ مەن ششۋچينسك قالالارىنىڭ اراسىنداعى اۆتوجولدىڭ 277-شاقىرىمىندا بولعان.
"Volkswagen Passat كولىگىنىڭ جۇرگىزۋشىسى مەن ءبىر جولاۋشىسى وقيعا ورنىندا كوز جۇمدى. ال Kia K5 جۇرگىزۋشىسى مەن ءۇش جولاۋشىسى ءتۇرلى جاراقاتتارمەن مەديسينالىق مەكەمەگە جەتكىزىلدى"، - دەلىنگەن رەسمي حابارلامادا.
ءقازىر بۇل دەرەك بويىنشا سوتالدى تەرگەۋ جۇرگىزىلىپ جاتىر. ناتيجەسىندە پروسەستىك شەشىم قابىلداناتىن بولادى.
ۆەدومستۆو مۇنداي قايعىلى جاعدايلاردى بولدىرماۋ ءۇشىن جۇرگىزۋشىلەرگە جىلدامدىق رەجيمىن ساقتاۋ قاجەتىن، اسىرەسە كولىك كوپ جۇرەتىن ۋچاسكەلەردە اباي بولۋدى، سونداي-اق اۆتوكولىكتىڭ تەحنيكالىق جاعدايىن قاداعالاۋ كەرەگىن ەسكە سالدى.
ايتا كەتەيىك، 15 تامىزدا شامامەن ساعات 14:00-دە اقتوبە وبلىسى، ايتەكەبي اۋدانىنا قاراستى بەلقوپا اۋىلىنىڭ ماڭىندا دا جول اپاتى بولىپ، ءتورت ادام قازا تاۋىپ، تاعى ۇشەۋى جاراقات العان ەدى. الدىن الا دەرەكتەر بويىنشا، Toyota Alphard كولىگى قارسى جولاققا شىعىپ كەتىپ، Volvo جۇك كولىگىمەن سوقتىعىسقان.