اقمولا وبلىسىندا اگروونەركاسىپ كەشەنىندەگى ءىرى جوبالار بەلسەندى تۇردە جۇزەگە اسىرىلىپ جاتىر. سولاردىڭ ءبىرى — تورعاي اۋىلدىق وكرۋگىندە مال شارۋاشىلىعى كلاستەرىن قۇرۋ.
«ەرەيمەنتاۋ-استىق» ج ش س 10 مىڭ باس قويعا ارنالعان بورداقىلاۋ جانە ءوسىرۋ فەرماسىنىڭ قۇرىلىسىن باستادى.
كومپانيالار توبىنىڭ باس ديرەكتور ورىنباسارى قونىسپەك ءنۇرعازيننىڭ ايتۋىنشا، جوبا اياسىندا بورداقىلاۋ الاڭىنا ارنالعان بازانى سالۋ جانە قايتا جاڭارتۋ، سەرۋەن الاڭدارىن، قورشاۋلار مەن استىق قويمالارىن، سونداي-اق مال ازىعىن وندىرەتىن سەح تۇرعىزۋ كوزدەلگەن. سونىمەن قاتار، تراكتورلار، ازىق تاراتقىشتار مەن جەم وندىرۋگە ارنالعان قۇرال-جابدىقتاردى ساتىپ الۋ جوسپارلانعان.
«ءبىز ەكسپورتتىق باعىتتى بەلسەندى تۇردە دامىتىپ جاتىرمىز. جىل باسىنان بەرى قازاقستاندىق ونىمدەردى كاتارعا جەتكىزۋدى باستادىق. قازاقستاندىق ەت اراب ەلدەرىندە جوعارى سۇرانىسقا يە جانە ءوز برەندى رەتىندە تانىلعان. ءبىز ءىرى كولەمدەگى جەتكىزىلىمدەرگە ۇزاق مەرزىمدى كەلىسىمشارتتار جاساسۋعا دايىنبىز. قازىرگى تاڭدا باا-دە اككرەديتاسيادان ءوتۋ جۇمىستارى ءجۇرىپ جاتىر»، — دەدى «التىن تاعا» حولدينگىنىڭ ساتۋ ءبولىمىنىڭ باسشىسى التىنبەك ورىنبايەۆ.
ەرەيمەنتاۋ قالاسىندا 10 مىڭ باس ءىرى قاراعا ارنالعان سيىر ەتىن وندىرەتىن اگروونەركاسىپ كەشەنى سالىنادى. جوبا اياسىندا جىلىنا 90 مىڭ توننا جەم جانە 7،6 مىڭ توننادان استام سيىر ەتىن ءوندىرۋ جوسپارلانعان.
جوبانىڭ ينۆەستورى — «Big Farm» ج ش س. كومپانيا بۇل تىك ينتەگراسيالانعان كەشەنگە 77 ملرد تەڭگەدەن استام ينۆەستيسيا سالۋدى جوسپارلاپ وتىر. بۇل قازاقستاننىڭ ەكسپورتتىق الەۋەتىن ايتارلىقتاي ارتتىرىپ، 380 تۇراقتى جۇمىس ورنىن اشۋعا مۇمكىندىك بەرەدى. سونىمەن قاتار، قىزمەتكەرلەر ءۇشىن تۇرعىن ۇيلەر سالۋ دا قاراستىرىلعان.
اقمولا وبلىسىنداعى مال شارۋاشىلىعى كلاستەرى — اگرارلىق سەكتوردى دامىتۋ مەن ەلدىڭ ازىق-تۇلىك قاۋىپسىزدىگىن قامتاماسىز ەتۋگە باعىتتالعان ستراتەگيالىق باعدارلامانىڭ ماڭىزدى بولىگى. بۇل باستاما ەت پەن ەت ونىمدەرىنىڭ ەكسپورت كولەمىن ارتتىرۋعا سەپ بولماق.