ۇكىمەتتە وتكەن بريفينگتە ەكولوگيا ءمينيسترى سەرىكقالي برەكەشيەۆ بۇل ماسەلە بويىنشا ءبىرجاقتى شەشىم قابىلدانباعانىن ايتتى.
دەگەنمەن ءمينيستردىڭ ايتۋىنشا، حالىقتان كەلىپ جاتقان ءتۇرلى نۇسقالار قاراستىرىلىپ جاتىر، دەپ حابارلايدى Almaty-akshamy.kz. Egemen.kz-كە سىلتەمە جاساپ.
«كوبى «نەگە اتىپ تاستاۋ كەرەك، باسقا وبلىستارعا كوشىرەيىك» دەدى. ءبىراق وكىنىشكە قاراي، بۇل ادىستەردى عىلىمي قوعامداستىق ءتيىمسىز جانە رۇقسات ەتىلمەيتىن دەپ تانىدى. سەبەبى كوشۋ ارەكەتى كەزىندە كيىكتەردىڭ ءولۋ ءقاۋپى جوعارى جانە ولاردىڭ بۇرىنعى تاريحي مەكەندەگەن ورنىنا قايتا ورالۋ ىقتيمالدىعى جوعارى. سوندىقتان ءقازىر بۇل ماسەلە قابىلدانبادى»، - دەدى سەرىكقالي برەكەشيەۆ.
سونىمەن قاتار قاسقىر سانىن كوبەيتۋ تۋرالى ۇسىنىستار دا بولدى. ءبىراق ءمينيستردىڭ ايتۋىنشا، بۇل نۇسقانىڭ ءوزى ماسەلەنى بىردەن شەشپەيدى.
«قاسقىر نەگىزىنەن السىرەگەن، اۋرۋ مالداردى پوپۋلياسيادان شىعارادى. ول ورماننىڭ ءامىرشىسى بولىپ سانالادى. كەرىسىنشە، بۇل تەك حالىق سانىن جاقسارتۋعا كومەكتەسەدى، تابىن ساۋ بولادى»، - دەپ قوستى مينيستر.
ونىڭ ايتۋىنشا، ءقازىر اۋىل شارۋاشىلىعى مينيسترلىگىمەن جانە قازاقستاننىڭ اۋىل شارۋاشىلىعىن ساقتاندىرۋ قاۋىمداستىعىمەن بىرلەسە وتىرىپ، كيىكتەردەن جايىلىمدار مەن ەگىستىكتەرگە زاقىم كەلگەن جاعدايدا اۋىل شارۋاشىلىعىنا كەلتىرىلگەن زالالدى جانە ىقتيمال اۋىل شارۋاشىلىعىن ساقتاندىرۋدى باعالاۋ ادىستەمەسىن ازىرلەۋ ماسەلەسى قاراستىرىلىپ جاتىر.
«بۇگىندە باتىس قازاقستان وبلىسىنىڭ اۋىلشارۋاشىلىق تاۋار وندىرۋشىلەرىنىڭ سۇراقتارى مەن شاعىمدارى وزدىگىنەن جوعالىپ كەتتى. ويتكەنى اقبوكەننىڭ قونىس اۋداراتىن جانۋار ەكەنىن ەسكەرسەك، ولار وسى اۋماقتان وزدەرىنىڭ كوشى-قون جولدارىن كەسىپ ءوتىپ ۇلگەرگەن. سوندىقتان ءقازىر اۋىل شارۋاشىلىعى القاپتارىنا زيان كەلتىرۋ ماسەلەسى جوق»، - دەدى مينيستر.
سوعان قاراماستان، ەكولوگيا مينيسترلىگى عىلىم مينيسترلىگىمەن بىرلەسە، كۇزدە 500 اقبوكەندى اتپاستان، ساراپتامادان وتكىزبەك.
«سونىمەن بىرگە كەلەسى جىلى سپورتتىق جانە اۋەسقويلىق اڭشىلىقتى ۇيىمداستىرۋ جانە وتكىزۋ ماسەلەسى قاراستىرىلىپ جاتىر. بۇل اقىلى اڭشىلىق بولادى. نەگىزىندە اقبوكەننىڭ قىزىل كىتاپقا ەنگەن جانۋار ەمەس ەكەنىن جوعارىدا ايتقان ەدىك. بىزدە 2023 جىلدىڭ 1 قاڭتارىنا دەيىن اڭ اۋلاۋعا تىيىم سالىنعان. ءقازىر بۇل ماسەلەلەر قاراستىرىلىپ، جاقىن ارادا، قازان ايىنىڭ سوڭىنا دەيىن ناقتى شەشىمىن تابامىز»، - دەدى س.برەكەشيەۆ.
ەسكە سالا كەتەيىك، 14 شىلدەدە ۇكىمەتتىڭ كەڭەيتىلگەن وتىرىسىندا ەكولوگيا ءمينيسترى سەرىكقالي برەكەشيەۆكە كيىكتەردى اتۋ تۋرالى شەشىمى ءۇشىن پرەزيدەنتتەن سوگىس الدى.
«80 مىڭ اقبوكەندى تابيعي لاندشافتتان شىعارۋ، ياعني قىرۋ جونىندە ۇسىنىس جاسالىپ جاتىر. ءبىراق باسقا ادىستەر بار، ساراپشىلارمەن كەڭەسىڭىز. بۇل ەڭ ەكسترەمالدى دەگەن شارالار. وسىنداي ىسكە بارۋ قاجەت بولۋى مۇمكىن ەكەنىن جوققا شىعارمايمىن. ءبىراق بۇل - شەكتەن شىققان شارا»، - دەدى مەملەكەت باسشىسى سول كەزدە.