11 ماۋسىمدا دەنساۋلىق ساقتاۋ ءمينيسترى اقمارال ءالنازاروۆا ۇكىمەت بريفينگىندە "اق وكپە سيندرومى" دەپ اتالاتىن اۋرۋدىڭ قازاقستانعا جەتكەن-جەتپەگەنىن ايتتى، دەپ حابارلايدى اlmaty-akshamy.kz.
دەنساۋلىق ساقتاۋ مينيسترلىگىنىڭ باسشىسى ءقازىر قىتايدا ينفەكسيانىڭ جاڭا ۆيرۋستىق ءتۇرى "اق وكپە سيندرومى" بەلسەندى تۇردە تارالىپ جاتقانىن اتاپ ءوتتى. سونىمەن قاتار، اقش پەن ەۋروپادا جاعدايلار انىقتالدى.
اۋرۋدىڭ نەگىزگى بەلگىلەرى - 39 گرادۋس تەمپەراتۋرا جانە ءۇش ايعا دەيىن سوزىلعان جوتەل.
"وتكەن جىلدىڭ ەپيدەميالىق كەزەڭىمەن سالىستىرعاندا ءبىز ۆيرۋستىق ينفەكسيالار دەڭگەيىنىڭ وسكەنىن بايقامادىق. قازاقستاندىقتاردىڭ اعزادا قانداي ۆيرۋس بار ەكەنىن ءبىلۋ ءۇشىن پتر تەستىن تاپسىرۋعا مۇمكىندىك بار. اۋرۋعا كەلەتىن بولساق، بۇل ماسەلە كۇندەلىكتى باقىلاۋدا. ەلگە كەلگەن بەتتە ايتارلىقتاي كۇردەلى سانيتارلىق بوگەت بار. سوندىقتان قازاقستاندا ينفەكسيانىڭ جاڭا ءتۇرى پايدا بولدى دەپ ايتا المايمىز"، - دەدى اقمارال ءالنازاروۆا.
2023 جىلدىڭ قاراشا ايىنىڭ سوڭىندا قىتايدىڭ سولتۇستىك ايماقتارىندا بەلگىسىز پنيەۆمونيانىڭ جاپپاي ىندەتى بولدى. عالىمداردىڭ ۇزاق مەرزىمدى زەرتتەۋلەرى جاپپاي ينفەكسيانىڭ سەبەبى انتيبيوتيكتەردىڭ كوپشىلىگىنە ءتوزىمدى سۋپەرباكتەريالار بولدى دەگەن قورىتىندىعا كەلدى. قىتايداعى ىندەت "اق وكپە" دەپ اتالدى، سەبەبى پنيەۆمونيامەن اۋىراتىن بالالاردىڭ وكپەسىنىڭ رەنتگەنوگرافياسىندا اق داقتار پايدا بولدى.