اپتا سوڭىندا مەديسينا قىزمەتكەرلەرى كاسىبي مەرەكەلەرىن اتاپ وتەدى. بۇل – تەك دارىگەرلەر مەن مەيىربيكەلەرگە عانا ەمەس، سونداي-اق ادامنىڭ ءومىرىن جاقسارتۋعا ۇلەس قوسىپ جۇرگەن بارلىق مەديسينا ماماندارىنا دەگەن العىس ءبىلدىرۋ كۇنى. ءبىز اق حالات كيگەن جانداردى جالپى ءبىر بەينەدە ەلەستەتكەنىمىزبەن، بۇل سالادا ءبىز بىلمەيتىن، ءتىپتى ەستىمەگەن ماماندىقتار بار. ولار – ادام دەنساۋلىعىنا تەك فيزيكالىق تۇرعىدان ەمەس، رۋحاني، پسيحولوگيالىق، تەحنولوگيالىق جانە ەتيكالىق جاعىنان دا جاۋاپ بەرەتىن ەرەكشە ماماندار.
مەرەكەگە وراي نازارلارىڭىزعا كەڭ تارالماعان، ءبىراق ماڭىزى زور مەديسيناداعى ەرەكشە بەس ماماندىقتى ۇسىنامىز.
1. عارىش پسيحولوگى – اسپان الەمىن زەرتتەيتىندەردىڭ جان تىنىشتىعىن باقىلايدى
عارىشكەرلەر – جەر بەتىنەن الشاقتاپ، وقشاۋلانعان ورتادا ايلاپ، جىلداپ ءومىر سۇرەتىن جاندار. مۇنداي جاعدايدا ولاردىڭ پسيحولوگيالىق جاعدايىن باقىلاۋ – وتە ماڭىزدى مىندەت.
عارىش پسيحولوگىنىڭ جۇمىسى – بالا كەزبەن بايلانىستى سەزىمدەرمەن جۇمىس ىستەپ، سول كەزدە الىنعان جاراقاتتى زەرتتەۋ عانا ەمەس. ول عارىشكەر بولۋعا ۇمىتكەرلەردىڭ پسيحيكالىق توزىمدىلىگىن باعالايدى، ارنايى تەستتەر ازىرلەيدى، كوماندالىق ۇيلەسىمدىلىكتى انىقتايدى جانە ۇشۋ بارىسىندا قولداۋ كورسەتەتىن باعدارلامالار جاسايدى. بۇل مامان ۇشۋ الدىنداعى ىرىكتەۋ مەن ۇشۋ كەزىندەگى پسيحولوگيالىق تۇراقتىلىقتىڭ كەپىلى دەۋگە بولادى.
2. بيوەتيك – عىلىم مەن ادامگەرشىلىك اراسىنداعى شەكارانى قورعايدى
بيوەتيك – قازىرگى زامان بيومەديسيناسىندا تۋىندايتىن ەتيكالىق جانە زاڭدىق ماسەلەلەردى زەرتتەيتىن جاڭا ماماندىق. بۇل سالا تەك 2020 جىلدان باستاپ دامي باستادى.
مىسالى، اعزالاردى كلونداۋ، ەمبريون گەنىن وزگەرتۋ نەمەسە جاساندى ۇرىق جاساۋ كەزىندە بيوەتيك مامان عىلىمي جاڭالىقتار زاڭ مەن ادامگەرشىلىككە قايشى كەلمەيتىندەي رەتتەپ وتىرادى. بۇگىندە بۇل ماماندىققا الەمنىڭ جەتەكشى مەديسينالىق ۋنيۆەرسيتەتتەرىندە ارنايى وقىتا باستادى، سونىڭ ءبىرى – يەل ۋنيۆەرسيتەتى.
3. IT-مەديسينا قىزمەتكەرى – تەحنولوگيا مەن مەديسينانىڭ توعىسقان تۇسى
سيفرلاندىرۋ داۋىرىندە مەديسينا مەن ءىت سالاسىنىڭ بىرىگۋى – زاڭدى قۇبىلىس. IT-مەديسينا مامانى – ەمدەۋ ءىسىن جاقسى بىلەتىن، ءبىراق باستى مىندەتى مەديسينالىق قۇرىلعىلارعا ارنالعان باعدارلامالار ازىرلەپ، دياگنوستيكالىق جۇيەلەردى اۆتوماتتاندىرىپ، دەرەكتەردى وڭدەءيتىن ماماندار.
بۇل ماماندىقتى مەڭگەرۋ ءۇشىن اۋەلى مەديسينا بويىنشا بازالىق ءبىلىم الىپ، كەيىن بيوينفورماتيكا، قوعامدىق دەنساۋلىق نەمەسە مەديسينالىق ينجەنەريا باعىتىندا ءبىلىمىن تەرەڭدەتۋ قاجەت.
4. نەوناتولوگ – ءومىردىڭ العاشقى ساتىنەن باستاپ قامقورلىق جاسايتىن مامان
نەوناتولوگيا – نارەستە دۇنيەگە كەلگەن ساتتەن باستاپ، ونىڭ العاشقى كۇندەرى مەن اپتالارىندا كۇتىم مەن ەمدەۋ جاسايتىن مەديسينا سالاسى. بۇل ماماندار شالا تۋعان، ءالسىز نەمەسە اۋرۋ نارەستەلەردىڭ ءومىرى ءۇشىن كۇرەسەدى.
ال نەوناتالدى رەانيماتولوگتار – بوسانۋ كەزىندە تۋىنداعان اسقىنۋلارعا قارسى شۇعىل كومەك كورسەتەتىن جوعارى دايىندىقتاعى دارىگەرلەر. ولاردىڭ بىلىكتىلىگى مەن شاپشاڭدىعى مىڭداعان ءسابيدىڭ ءومىرىن ساقتاپ قالادى.
5. تەلەمەديسينا دارىگەرى – قاشىقتان كەڭەس بەرەتىن زاماناۋي مامان
پاندەميادان كەيىن كەڭ تاراعان ماماندىقتاردىڭ ءبىرى – تەلەمەديسينا دارىگەرى. بۇل دارىگەرلەر ناۋقاستارمەن ونلاين بايلانىس ورناتىپ، ولاردىڭ شاعىمىنا بايلانىستى كەڭەس بەرەدى، العاشقى ۇسىنىمدارىن ۇسىنادى.
تولىققاندى ەمدەۋگە باعىتتالماعانىمەن، ۋاقىت پەن قاشىقتىقتى ۇنەمدەۋدىڭ ءتيىمدى جولى رەتىندە سۇرانىسقا يە. بۇل ماماندىققا يە بولۋ ءۇشىن بازالىق مەديسينالىق بىلىممەن قاتار، قارىم-قاتىناس ماشىقتارى، جازباشا ساۋاتتىلىق پەن ەموسيونالدى تۇراقتىلىق ماڭىزدى.
مەديسينا – تەك ەمدەۋ عانا ەمەس. ول – عىلىم، تەحنولوگيا، ەتيكا مەن پسيحولوگيانىڭ توعىسقان كەڭىستىگى. بۇگىندە اق حالاتتىلاردىڭ قاتارىنا تەك حيرۋرگ پەن تەراپيەۆت قانا ەمەس، جوعارىدا اتالعان سەكىلدى ەرەكشە سالا ماماندارى دا كىرەدى. ولاردىڭ ءبارى دە – ادام ءومىرىنىڭ قاۋىپسىزدىگى مەن ساۋلىعى ءۇشىن قىزمەت ەتەتىن كوزگە كورىنبەيتىن قاھارماندار.