الەۋمەتتىك جەلى قولدانۋشىلارى ادام پاپيللوما ۆيرۋسىنا قارسى ۆاكسيناسيا بەدەۋلىككە اكەلۋى مۇمكىن ەكەندىگى تۋرالى ۆيدەونى تالقىلاۋدا. ۇكىمەت بالالاردى زارارسىزداندىرماق ەكەن. بۇل جالعان، دەپ حابارلايدى aqshamnews.kz Stopfake.kz-كە سىلتەمە جاساپ.
ق ر دەنساۋلىق ساقتاۋ مينيسترلىگى سانيتارلىق-ەپيدەميولوگيالىق باقىلاۋ كوميتەتىنىڭ باسپا ءسوز قىزمەتى بۇعان قاتىستى تۇسىنىكتەمە بەردى.
«اپۆ-عا (ادام پاپيللوماسى ۆيرۋسىنا) قارسى ۆاكسيناسيا ستەريلدەۋگە جانە بەدەۋلىككە اكەلەتىنى تۋرالى الەۋمەتتىك جەلىلەردە جانە مەسسەندجەرلەردە تارالىپ جۇرگەن اقپارات عىلىمعا قايشى كەلەدى، شىندىققا جاناسپايدى جانە فەيك بولىپ تابىلادى.
ق ر دسم سانيتارلىق-ەپيدەميولوگيالىق باقىلاۋ كوميتەتى بۇگىنگى كۇنى اپۆ ينفەكسياسىن جۇقتىرۋدىڭ جانە جاتىر موينى وبىرىنىڭ دامۋىنىڭ الدىن الۋدىڭ جالعىز ءادىسى – ۆاكسيناسيا ەكەنىن تاعى دا ەسكە سالادى.
جىل سايىن قازاقستاندا جاتىر موينى وبىرىنىڭ 1900-گە جۋىق جاڭا جاعدايى، كۇن سايىن 5 جاڭا جاعداي تىركەلەدى، جىل سايىن 600-دەن استام ايەل، كۇن سايىن 2 ايەل وسى پاتولوگيادان قايتىس بولادى.
اۋرۋشاڭدىق دەڭگەيى مەن ۆاكسيناسيانىڭ تيىمدىلىگىن ەسكەرە كەلە، 135 ەلدە بۇل ۆاكسينا ۇلتتىق ەگۋ كۇنتىزبەسىنە ەنگىزىلگەن.
قازاقستاندا 11 جاستاعى قىزداردى اپۆ-عا قارسى ۆاكسيناسيالاۋ بيىل كۇزدە ەنگىزىلمەك. اپۆ-عا قارسى ۆاكسيناسيالاۋ كەزىندە دۇنيەجۇزىلىك دەنساۋلىق ساقتاۋ ۇيىمىمەن سەرتيفيكاتتالعان جانە تيىمدىلىگى مەن قاۋىپسىزدىگى دالەلدەنگەن «مەرك شارپ جانە دوۋم» (اقش) كومپانياسى شىعارعان 4 ۆالەنتتى «گارداسيل» ۆاكسيناسى قولدانىلادى.
كوپتەگەن زەرتتەۋلەردىڭ، سونىڭ ىشىندە قازاقستاندا جۇرگىزىلگەن زەرتتەۋلەردىڭ ناتيجەلەرى ۆاكسينانى الماعان ايەلدەر توبىنا قاراعاندا اپۆ قارسى ۆاكسيناسيادان وتكەن ايەلدەردىڭ رەپرودۋكتيۆتى دەنساۋلىعى الدەقايدا جاقسى ەكەنىن كورسەتتى. كوپتەگەن الەمدىك زەرتتەۋلەرگە (دانيادا، كانادادا، اقش-تا جانە ت.ب.) سايكەس، فەرتيلدىلىكتىڭ بۇزىلۋىمەن، انالىق بەزدىڭ سارقىلۋ سيندرومىمەن نەمەسە باسقا رەپرودۋكتيۆتى بۇزىلۋلارمەن بايلانىس بايقالماعان.
ناقتى ەمەس اقپاراتتى تاراتاتىن ادامداردىڭ ىس-ارەكەتتەرىنە قۇقىقتىق باعا بەرۋ ءۇشىن ماتەريالدار قۇقىق قورعاۋ ورگاندارىنا بەرىلدى»، — دەلىنگەن ق ر دەنساۋلىق ساقتاۋ مينيسترلىگى سانيتارلىق-ەپيدەميولوگيالىق باقىلاۋ كوميتەتىنىڭ حابارلاماسىندا.
ۆەدومستۆو الەۋمەتتىك جەلىلەردى پايدالانۋشىلاردى جانە بارلىق ازاماتتى ءوز دەنساۋلىعىنا جاۋاپكەرشىلىكپەن قاراۋعا، تەك رەسمي كوزدەردەن الىنعان سەنىمدى اقپاراتقا عانا سەنۋگە شاقىرادى.