مەملەكەتتىك كىرىستەر كوميتەتىنىڭ دەرەگىنشە، 2022 جىلدىڭ 1 قاڭتارىنان باستاپ قازاقستاندا ينتەرنەت ارقىلى تاۋار ۇسىناتىن نەمەسە ەلەكتروندى قىزمەت كورسەتەتىن شەتەلدىك كومپانيالارعا قاتىستى جاڭا سالىق تەتىگى ەنگىزىلگەن، دەپ حابارلايدى Aqshamnews.kz ءتىلشىسى.
كوپشىلىككە «Google سالىعى» رەتىندە بەلگىلى بۇل مەحانيزم شەتەلدىك پلاتفورمالاردى قازاقستاندا تىركەلۋگە جانە 12% مولشەرلەمەمەن قوسىلعان قۇن سالىعىن تولەۋگە مىندەتتەيدى.
قازىرگى تاڭدا ەلىمىزدە 118 شەتەلدىك كومپانيا تىركەلگەن. ولاردىڭ قاتارىندا Apple، Microsoft، OpenAI، Canva، Valve جانە Temu سەكىلدى الەمدىك الپاۋىت برەندتەر بار. 2025 جىلدىڭ وزىندە Chess.com، Canyon Bicycles GmbH جانە تاعى 20 كومپانيا تىزىمگە قوسىلعان.
كوميتەتتىڭ مالىمەتىنشە، جاڭا جۇيە كۇشىنە ەنگەننەن بەرى شەتەلدىك ينتەرنەت-پلاتفورمالار قازاقستان بيۋدجەتىنە 118،4 ملرد تەڭگە اۋدارعان. ونىڭ 48،6 ملرد تەڭگەسى 2025 جىلداعى ءتۇسىم، بۇل وتكەن جىلدىڭ سايكەس كەزەڭىمەن سالىستىرعاندا 20 ملرد تەڭگەگە ارتىق.
2025 جىلى ەڭ ءىرى سالىق تولەۋشىلەردىڭ العاشقى ۇشتىگىنە Valve Corporation (8،6 ملرد تگ)، Apple (8 ملرد تگ) جانە Temu (6،2 ملرد تگ) كىرگەن.
ۆەدومستۆو قازاقستان ەنگىزگەن بۇل مودەل ەىدۇ ۇسىنىمدارىنا سايكەس كەلەتىنىن جانە الەمدىك تاجىريبەگە تولىق ساي ەكەنىن اتاپ ءوتتى. وسىنداي سيفرلىق سالىقتار ەۋروپالىق وداق ەلدەرىندە، ۇلىبريتانيادا، كانادادا، ءۇندىستاندا، جاپونيا مەن اۆستراليادا دا قولدانىلادى.
كوميتەت وكىلدەرى «سيفرلىق ققس» ەنگىزۋ ءبىر جاعىنان مەملەكەتتىك بيۋدجەتتىڭ كىرىسىن ۇلعايتسا، ەكىنشى جاعىنان وتاندىق IT-كومپانيالار ءۇشىن تەڭ باسەكەلەستىك الاڭ قالىپتاستىرىپ، سيفرلىق قىزمەتتەر نارىعىندا اشىقتىق پەن ادىلدىكتى ارتتىرعانىن جەتكىزدى.