بيىلعى Apple Fest الماتىلىقتار مەن قالا قوناقتارىنىڭ ەسىندە تەك اۋقىمدى مادەني باعدارلاماسىمەن عانا ەمەس، سونىمەن قاتار ەرەكشە جەتىستىكتەرىمەن قالدى. فەستيۆال تاريحىندا العاش رەت 1 700 ليتر الما كومپوتى قايناتىلىپ، بۇل گيننەستىڭ رەكوردتار كىتابىنا ەندى. كومپوتتى ساتۋدان تۇسكەن قاراجات قالا ساياباقتارى ءۇشىن قۇس ۇيلەرىن، قورەكتەندىرگىشتەر مەن اعاش جانە بۇتا كوشەتتەرىن ساتىپ الۋعا باعىتتالادى.
Apple Fest اياسىندا الماتىلىق 50 باعبان 130 توننادان استام الما، سونىڭ ىشىندە ايگىلى «اپورت» سورتىن ۇسىندى. پارك اۋماعىندا سيرك شاپيتو جۇمىس ىستەپ تۇر، ونىڭ استىندا «كۋرەز» كلوۋندار كۆارتەتى، تروستتارداعى ەكۆيليبر، ەفيوپيادان كەلگەن Black Eagles كومانداسى يكاريي ويىندارىمەن، روليكتەگى اكروباتتار، ارقانمەن جۇرۋشىلەر جانە ۇيرەتىلگەن جىلقىلار مەن يتتەر ونەر كورسەتەدى. ايتا كەتۋ كەرەك، سيرك 25 قىركۇيەككە دەيىن جۇمىسىن جالعاستىرادى. سيرك قويىلىمدارىنان باسقا، بارلىق كونسەرتتەر مەن اتتراكسيوندارعا تەگىن كىرۋگە بولادى.
فەستيۆالدىڭ باستى ساحناسىندا Republic بي ۇجىمى، ءانشى تولقىن زابيروۆا، Sopranova جانە Umberto project توپتارى ونەر كورسەتتى. سونىمەن قاتار، قازاقستاننىڭ حالىق ءارتىسى روزا رىمبايەۆا، ەڭبەك سىڭىرگەن ءارتىس باقتيار تايلاقبايەۆ جانە الماتى قالاسىنىڭ ەسترادالىق-سيمفونيالىق وركەسترى كونسەرتتى جالعاستىردى. ودان كەيىن ەتنوتوپ Steppe Sons، Umberto project، «اسۋ» توبى، ديماش داۋلەتوۆ، Kyle Ruh، داۋرەن بايبوري، ەرنازار جۇبان، باۋىرجان مۋسين، ديانا يسمايلوۆا جانە باسقا دا ارتىستەر كورەرمەندەردى قۋانتتى.
فەستيۆال كەزىندە ساياباق اۋماعى تاقىرىپتىق ايماقتارعا ءبولىندى. مىسالى، «باقشا يننوۆاسيالارى» ايماعىندا قوناقتارعا الماتىنىڭ كوگالداندىرۋ بارىسىندا يننوۆاسيالىق تاسىلدەر قالاي قولدانىلاتىنى كورسەتىلدى. «گۇل عاجايىپتارى بۋلۆارى» ۇلكەن باققا اينالدى.
سونىمەن قاتار، الما، قولونەر، كرافت ونىمدەرى جارمەڭكەسى، ەلشىلىك اللەياسى، باقشا قۇرال-جابدىقتارى جارمەڭكەسى سياقتى ءىس-شارالار ۇيىمداستىرىلدى. كۇنى بويى اشىق اسپان استىنداعى كينوتەاتردا قازاق كينوسىنىڭ «التىن قورىنان» فيلمدەر كورسەتىلدى.
