قازاقستان رەسپۋبليكاسى پرەزيدەنتىنىڭ باستاماسىمەن العاش رەت "Garden Day — Aport" اتتى باقشا كۇنى اتالىپ ءوتتى. بۇل ەرەكشە شارا قازاق جەمىس-كوكونىس شارۋاشىلىعى عىلىمي-زەرتتەۋ ينستيتۋتىنىڭ تالعار ايماقتىق فيليالىندا ۇيىمداستىرىلدى. اۋىل شارۋاشىلىعى مينيسترلىگىنىڭ مالىمدەۋىنشە، بۇل باستاما ەلىمىزدىڭ اۋىل شارۋاشىلىعى مەن ۇلتتىق برەندىمىز – اپورت الماسىن قايتا جاڭعىرتۋعا باعىتتالعان.
ءىس-شاراعا ەلىمىزدىڭ اۋىل شارۋاشىلىعى ۆيسە-مينيسترى ەربول تاسجۇرەكوۆ، الماتى وبلىسى اكىمىنىڭ ورىنباسارى نۇرجان قۇدايبەرگەنوۆ، عىلىمي-زەرتتەۋ ينستيتۋتتارىنىڭ باسشىلارى، اگروبيزنەس وكىلدەرى جانە تۇركيا، پولشا مەن بولگاريادان كەلگەن عالىمدار قاتىستى.
اپورت الماسى – قازاقستاننىڭ ەرەكشە تابيعي بايلىعى، سوندىقتان ونى قايتا جاڭعىرتۋ – ۇلتتىق مادەنيەت پەن اۋىل شارۋاشىلىعى ءۇشىن ماڭىزدى ءىس. قازاقستان رەسپۋبليكاسى ۇلتتىق عىلىم اكادەمياسىنىڭ پرەزيدەنتى اقىلبەك كۇرىشبايەۆ «تالعار» فيليالىندا 5 گەكتار جەرگە الماتى اپورتى مەن قان قىزىل اپورت الماسىنىڭ انالىق كوشەتتەرى وتىرعىزىلعانىن اتاپ ءوتتى. بۇل كوشەتتەر اپورتتىڭ 115 كلونىنان دامدىك ساپاسى مەن اۋرۋعا توزىمدىلىگىنە قاراي مۇقيات ىرىكتەلگەن. سونىمەن قاتار، گەنەتيكالىق تالداۋ ارقىلى سيۆەرس جابايى الماسىنىڭ سورتتارى تاڭدالىپ، اپورتپەن ۇيلەسىمدى تۇردە وتىرعىزىلدى.
ەسكە سالساق، 2023 جىلى قازاقستاندا 251،5 مىڭ توننا الما ءوسىرىلدى، ونىڭ ىشىندە 98،5 مىڭ تونناسى يمپورتتالعان ءونىم بولىپ تابىلادى. ونەركاسىپتىك باقتاردا 194،1 مىڭ توننا الما جينالعان. ال بيىلدىڭ العاشقى جارتىسىندا ەلگە 94 مىڭ توننا الما يمپورتتالدى.
اۋىل شارۋاشىلىعى ۆيسە-مينيسترى ەربول تاسجۇرەكوۆ جەمىس-جيدەك شارۋاشىلىعىنىڭ ەل ەكونوميكاسى مەن ازىق-تۇلىك قاۋىپسىزدىگى ءۇشىن ەرەكشە ماڭىزدى ەكەنىن اتاپ ءوتىپ، بۇل سالاداعى باعبانداردى قولداۋ شارالارى تۋرالى ەگجەي-تەگجەيلى باياندادى. ول سونىمەن قاتار اپورت الماسىن قايتا جاڭعىرتۋ جانە ساقتاۋ بويىنشا شارالاردىڭ ماڭىزدىلىعىن، ءونىمنىڭ ەكولوگيالىق قاۋىپسىزدىگى مەن توپىراق قۇنارلىلىعىن قالپىنا كەلتىرۋدىڭ جاڭا تاسىلدەرىن تىلگە تيەك ەتتى.
ءىس-شاراعا قاتىسۋشىلار جەمىس-جيدەك شارۋاشىلىعىنىڭ بولاشاق دامۋ جولدارى مەن اپورت الماسىنىڭ ۇلىلىعىن قايتا ورالتۋ بويىنشا جوسپارلارىمەن تانىسىپ، بۇل باعىتتاعى عىلىمي-پراكتيكالىق ۇسىنىستاردى تىڭداپ قايتتى. اپورت الماسىنىڭ حوش ءيىسى مەن ءدامى ءبىر كەزدەرى بۇكىل الەمگە تانىمال بولعان، ەندى بۇل مۇرا قايتا جاندانىپ، بولاشاق ۇرپاققا ساقتالىپ قالماق.