ەلىمىزدىڭ تۇكپىر-تۇكپىرىندە كۇنىنە قانشا توتەنشە وقيعا بولىپ جاتاتىنىن ءبىز بىلە بەرمەيمىز. سونىڭ ءبىرى – ءورت.
كۇنى كەشە عانا الماتىداعى «اقكەنت» ىقشاماۋدانىندا كوپقاباتتى ءۇي وتقا وراندى. «اپات ايتىپ كەلمەيدى» دەسەك تە، مۇنداي كەلەڭسىز جاعدايعا جول بەرمەۋدى ويلاستىرۋ، الدىن الۋدىڭ مۇمكىندىكتەرىن قاراستىرۋ اسا ماڭىزدى.
باسقا مەگاپوليستەردەگى سياقتى، سوڭعى ۋاقىتتا الماتىدا دا توبەسى كوك تىرەگەن ءزاۋلىم ۇيلەر كوپتەپ بوي كوتەرۋدە. بۇرىنعى سالىنعان ۇيلەردە، نەگىزىنەن، تابيعي، ساپالى ماتەريالدار پايدالانىلعان بولسا، قازىرگى قولدانىستاعىلاردىڭ دەنى – سينتەتيكا مەن پلاستيك. ءبىر انىعى، ولار جانعان كەزدە بولىنەتىن نارسە تابيعي زاتتاردىكىنە قاراعاندا اناعۇرلىم ۋلى ەكەنى جانە ءورتتىڭ تارالۋى دا ايتارلىقتاي تەز بولاتىنى ءمالىم. مۇنداي جاعدايدا قىزىل جالىن قۇرساۋىندا قالعان ادامداردى قۇتقارۋ ءۇشىن ءاربىر مينۋت، ءتىپتى ءاربىر سەكۋند قىمبات.
تەحنولوگيا جەتىلگەن بۇگىنگى زاماندا كوپقاباتتى ۇيلەردىڭ قۇرىلىسىن ءورت قاۋىپسىزدىگىن قامتاماسىز ەتە وتىرىپ جۇرگىزۋ قاراستىرىلمايدى دەپ ايتا المايمىز. ءبىراق ماماندار ءتيىستى نورمالار جوبادا كورسەتىلگەنىمەن، قۇرىلىس بارىسىندا ساقتالا بەرمەيتىنىن جوققا شىعارمايدى. بۇل رەتتە، تۇرعىنداردىڭ وزدەرى دە پاتەرلەرىن باستاپقىدا قاراستىرىلماعانداي عىپ قايتا جوبالاپ، كەيدە ءتىپتى ورتكە قارسى جۇيەلەردى ءوشىرىپ، ءورت سوندىرۋشىلەرگە ارنالعان وتكەلدەردى جاۋىپ تاستايتىن كورىنەدى.
مۇنىڭ سىرتىندا، قۇرىلىس جۇرگىزۋشى كومپانيالاردىڭ دا بارلىعى بىردەي قاجەتتى نورمالاردى ەسكەرە بەرمەيدى. مىسالى، الماتىداعى كەيبىر تۇرعىن ءۇي كەشەندەرىندە اراسىنان ارنايى تەحنيكا تۇگىلى، ادام ارەڭ وتەتىن، ياعني بىر-بىرىنە تىم جاقىن سالىنعان ۇيلەر كوپ. ال اياقاستى توتەنشە جاعداي بولا قالسا، بۇل اسىرەسە جوعارى قاباتتارداعى تۇرعىندار ءۇشىن وتە ءقاۋىپتى. ويتكەنى كوپقاباتتى عيماراتتارداعى تىك قۇبىر ءتۇتىن مەن ءورتتىڭ جوعارىعا تەز كوتەرىلۋىنە جول اشادى. ياعني تومەنگى قاباتتا وت شىقسا، بىرنەشە مينۋتتان كەيىن-اق ەڭ جوعارى قاباتتاعىلار تۇنشىعا باستايدى. تۇتىننەن كوز اشا المايتىن عيماراتتا باسپالداققا جۇگىرۋ دە ءتيىمسىز. سونداي-اق، ءورت كەزىندە ءليفتىنى پايدالانۋعا دا تىيىم سالىنادى. ليفت شاحتاسىمەن تارالعان ءتۇتىن ەلەكتر جەلىسىن ىستەن شىعارىپ، ادام مۇلدە قۇرساۋدا قالىپ قويۋى مۇمكىن.
ياعني ءورت قاۋىپسىزدىگىن قامتاماسىز ەتۋ ءۇشىن كوپقاباتتى ۇيلەردە ءتۇتىن شىعارۋ، ءورت ءسوندىرۋ جۇيەلەرى، تەمپەراتۋرا داچيكتەرى ءمىنسىز جۇمىس ىستەۋى قاجەت، ەۆاكۋاسيالىق باسپالداقتار اشىق جانە بوس بولۋعا ءتيىس.
ءورتتىڭ ەڭ اۋىر سالدارى – ادام ومىرىنە تونەتىن ءقاۋىپ. بۇل جەردە تەك وتقا ورانعان پاتەر تۇرعىندارى عانا ەمەس، قانشاما ءورت سوندىرۋشىلەر باسىن قاتەرگە تىگەدى! ولار تەك قىزمەت بابىمەن عانا ارەكەت ەتپەيدى، وزدەرىنىڭ ادامدىق، ازاماتتىق بورىشىن دا وتەيدى. الاپات ورتپەن الىسا ءجۇرىپ تۇرعىنداردى قۇتقارعانىمەن، وزدەرىن كۇيىك شالىپ، اۋىر جاراقات العاندارى، ءتىپتى ومىرمەن قوشتاسقاندارى قانشاما!..
كۇنى كەشە «اقكەنتتە» بولعان ورتتە دە الماتىنىڭ توتەنشە جاعدايلار دەپارتامەنتى قىزمەتكەرلەرىنىڭ جانقيارلىق ارەكەتى ارقاسىندا تالاي تۇرعىن امان قالدى. ال سولاردىڭ ەڭبەگى لايىقتى باعالانىپ ءجۇر مە؟ وزدەرىنىڭ قاۋىپسىزدىگىنە قانشالىقتى كەپىلدىك بار؟ ول، ارينە، بولەك اڭگىمە.