وسى دەنساۋلىق سالاسى داۋدان ارىلمادى. بۇل جولى الماتىلىقتاردىڭ شامىنا تيگەن نەگىزگى ماسەلە كەزەك كۇتۋ جانە 075/ۋ فورماسىنداعى مەديسينالىق انىقتاما، دەپ حابارلايدى اlmaty-akshamy.kz .
- اۋىرماعان سوڭ، اق حالاتتىلاردى ىزدەي بەرمەيمىز. وتكەندە جۇمىس ورنىمدى اۋىستىردىم. الگى جۇمىس ورنىما 075/ۋ فورماسىنداعى مەديسينالىق انىقتاما كەرەك بولدى. الا سالايىن دەپ تىركەلگەن ەمحاناما باردىم. تىركەۋشى مەنى بىردەن اقىلى بولىمگە جىبەردى. ويلانباستان سوندا باردىم. سويتسەم، الگى انىقتامانى الۋ ءۇشىن 10 000 تەڭگە تولەۋىم كەرەك ەكەن. سول كەزدە نە ءۇشىن اقىلى بولىمگە جىبەردى دەگەن وي كەلدى. سودان قايتا تىركەۋشىگە كەلىپ، ول انىقتامانى تەگىن الۋعا نە كەدەرگى ەكەنىن سۇرادىم. سويتسەم، اڭقاۋلىعىمدى پايدالانۋ ەكەن. سونىمەن قىزىق ەندى باستالدى. انىقتاما الۋ ءۇشىن ۋچاسكەلىك دارىگەرىمە بارۋ كەرەك بولدى. ال وعان كەزەك كۇتۋ كەرەك، - دەيدى دارحان ەسىمدى قالا تۇرعىنى.
تىركەۋشى الدىمەن كەزەكتى ناۋرىزدىڭ سوڭىنا قوياتىن بولىپتى. الايدا تۇرعىننىڭ شۋ شىعارۋىنان سوڭ ەكى كۇننەن كەيىنگە كەزەككە تۇرعىزعان.
- وسى اقىلى ءبولىم دەگەن ادامدى شاتاستىرادى. قاراپ تۇرىپ، بالا-شاعامنىڭ اۋزىنان جىرىپ ون مىڭ تەڭگە بەرە جازدادىم. ءبارى اقىلى بولسا، نەگە ءبىز مەملەكەتتىك الەۋمەتتىك ساقتاندىرۋ قورىنا قاراجات اۋدارامىز. ول جاقتان ءبىر جەلىنىپ، مىنا جاقتان ءبىر جەلىنسەك...،-دەيدى تۇرعىن.
شىندىعى كەرەك، قالا تۇرعىندارى اراسىندا ساۋالناما جۇرگىزىپ كوردىك. جۇمىسقا تۇرۋ ءۇشىن تالاپ ەتىلەتىن انىقتامانى اقىلى الاتىنى باسىم بولىپ شىقتى. ال انىقتاما 10 000 تەڭگە تۇرا ما؟ وسى جەردە زاڭدى ساۋال تۋىندايدى. نەگە اقىلى؟ انىقتامانى تەگىن الۋعا بولا ما؟ سوندىقتان ماسەلەنىڭ انىق-قانىعىنا كوز جەتكىزۋ ءۇشىن «الماتى قالاسى قوعامدىق دەنساۋلىق ساقتاۋ باسقارماسى» كومۋنالدىق مەملەكەتتىك مەكەمەگە جولداعان ساۋالىمىزعا تومەندەگىدەي جاۋاپ الدىق.
«075/ۋ فورماسىنداعى مەديسينالىق انىقتاما ازاماتتاردىڭ دەنساۋلىعى تۋرالى بەرىلەتىن كاسىبي-كلينيكالىق قورىتىندى بولىپ تابىلادى. 075/ۋ فورماسىنداعى انىقتاما بەكىتىلگەن ستاندارتقا سايكەس اقىلى تۇردە كورسەتىلەتىن مەملەكەتتىك قىزمەت بولىپ تابىلادى».
ال ءمامس ماسەلەسىنە قاتىستى كەلەسى جاۋاپتى الدىق:
«2015 جىلعى 16 قاراشاداعى № 405-V قرز «مىندەتتى الەۋمەتتىك مەديسينالىق ساقتاندىرۋ تۋرالى» قازاقستان رەسپۋبليكاسىنىڭ زاڭىنىڭ 14-بابى 2-تارماعى ءبىرىنشى بولىگىنىڭ 9) تارماقشاسىندا كوزدەلگەن ادامداردى قوسپاعاندا، قورعا وزدەرى ءۇشىن اۋدارىمدار جانە (نەمەسە) جارنالار تولەنبەگەن ادامدار مىندەتتى الەۋمەتتىك مەديسينالىق ساقتاندىرۋ جۇيەسىندەگى مەديسينالىق كومەككە قۇقىق الۋ ءۇشىن قورعا تولەنبەگەن كەزەڭ ءۇشىن، ءبىراق تولەم كۇنىنىڭ الدىنداعى ون ەكى ايدان اسىرماي، رەسپۋبليكالىق بيۋدجەت تۋرالى زاڭدا اعىمداعى قارجى جىلىنا بەلگىلەنگەن جالاقىنىڭ ەڭ تومەن مولشەرىنىڭ 5 پايىزى مولشەرىندە ءاربىر اي ءۇشىن جارنالار تولەۋگە مىندەتتى ەكەنىن حابارلايمىز، - دەيدى «الماتى قالاسى قوعامدىق دەنساۋلىق ساقتاۋ باسقارماسى» كمم حابارلاماسىندا.
تاقىرىپقا وراي
ەكى ەسە ارزان
075/ۋ فورماسىنداعى مەديسينالىق انىقتاماعا قاتىستى بىرنەشە جەكەمەنشىك مەديسينالىق ورتالىقتارعا حابارلاسىپ كوردىك.
«Azia medical» مەدورتالىعى انىقتامانى 4000 تەڭگەگە جاساپ بەرەدى ەكەن.
«ەمير مەد» ورتالىعى فليۋوروگرافياڭىز جوق بولعان جاعدايدا 5400 تەڭگەگە، ەگەردە قولىڭىزدا فليۋوروگرافياڭىز بولسا، 3500 تەڭگەگە جاساپ بەرەدى ەكەن.
«Algamed» ورتالىعىندا فليۋوروگرافياعا تۇسىرەتىن اپپاراتىنىڭ جوقتىعىنا بايلانىستى الگى انىقتامانى 3500 تەڭگەگە جاسايدى ەكەن.
قايسىسى ءتيىمدى ەكەنىن ءوزىڭىز باعامداپ كورەرسىز!..