ايىپپۇل تولەيسىڭ!
ءانۇرانعا لايىقتى قۇرمەت كورسەتپەگەن اتىراۋلىق اسكەري قىزمەتشىگە 172 500 تەڭگە ايىپپۇل سالىندى، دەپ حابارلايدى Almaty-akshamy.kz
AtyrauPress پورتالىنىڭ مالىمەتى بويىنشا، ماقات اۋدانىندا وتكەن سپورتتىق شارا كەزىندە ءانۇران ورىندالعاندا اسكەري قىزمەتشىلەردىڭ بىرەۋى وڭ قولىنىڭ ەكى ساۋساعىن عانا كەۋدە تۇسىنا قويىپ تۇرعانى ۆيدەوعا جازىلىپ قالعان. وسىدان كەيىن مەملەكەتتىك رامىزدەردى ناسيحاتتاۋ ۇلتتىق ورتالىعى وبلىستىق ىشكى ساياسات پەن اۋدان اكىمىنىنە شاعىم ءتۇسىرىپ، ءانۇرانعا لايىقتى قۇرمەت كورسەتپەگەن اسكەري قىزمەتشىنى جاۋاپقا تارتۋدى تالاپ ەتكەن.
جەرگىلىكتى پوليسيا باسقارماسىنىڭ باستىعى ەرلان بيعامبايەۆتىڭ ايتۋىنشا، ارىز "ە-وتىنىش" پورتالى ارقىلى تىركەلگەن. ودان كەيىن پوليسيا ءبولىمىنىڭ قاراۋىنا ءتۇستى.
"كىنالى ادام انىقتالدى، وعان زاڭ بويىنشا اكىمشىلىك ايىپپۇل سالىندى"، - دەيدى بيعامبايەۆ.
اكىمشىلىك قۇقىق بۇزۋشىلىق كودەكسىنىڭ 458-بابى، 1-تارماعى (قازاقستان رەسپۋبليكاسىنىڭ مەملەكەتتىك گيمنىن قازاقستان رەسپۋبليكاسى زاڭناماسىنىڭ تالاپتارىن بۇزا وتىرىپ پايدالانۋ جانە ورىنداۋ) بويىنشا حاتتاما راسىمدەلدى. وعان سايكەس، اسكەري قىزمەتشىگە 50 اەك (172 500 تەڭگە) كولەمىندە ايىپپۇل سالىندى. ءبىر اپتانىڭ ىشىندە ايىپپۇلدىڭ جارتىسىن عانا تولەۋگە بولادى.