سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اسحات جۇماعالي باس پروكۋراتۋرا جانىنداعى قۇقىق قورعاۋ ورگاندارى اكادەمياسىندا العاشقى كاسىپتىك دايارلىقتىڭ ءۇشىنشى لەگىنىڭ تىڭداۋشىلارىمەن كەزدەستى.
اڭگىمەلەسۋ بارىسىندا اگەنتتىك ءتوراعاسى ورگاننىڭ قىزمەتىنە جانە ەلدەگى جەمقورلىققا قارسى ءىس-قيمىل بويىنشا قابىلدانىپ جاتقان جۇيەلى شارالارعا توقتالدى، دەپ حابارلايدى اlmaty-akshamy.kz. ول مەملەكەتتىك ورگانداردىڭ قىزمەتىندەگى جەمقورلىق تاۋەكەلدەرىنىڭ الدىن الۋ جانە تالداۋ ماسەلەلەرىنە، سونداي-اق جەمقورلىققا قارسى اعارتۋ جانە قوعامدا جەمقورلىققا توزبەۋشىلىكتى قالىپتاستىرۋ جونىندەگى جۇمىستارعا ەرەكشە نازار اۋداردى. سونداي-اق، ا. جۇماعالي زاڭسىز شىعارىلعان اكتيۆتەردى مەملەكەتكە قايتارۋ جانە جەمقورلىققا قارسى كۇرەستىڭ ءتيىمدى الەمدىك ستاندارتتارى ەنگىزىلەتىن زاڭنامالىق باستامالاردى ىسكە اسىرۋ بويىنشا اۋقىمدى جۇمىستار تۋرالى ايتىپ بەردى.
«ءبىزدىڭ جۇمىسىمىز قىزىقتى. اگەنتتىكتە اناليتيكالىق الەۋەت جاقسى دامىعان، تالداۋشىلار بار. ءبىز مەملەكەتتىك ورگاندارمەن بىرگە جەمقورلىق تاۋەكەلدەرىنە سىرتقى تالداۋ، ىشكى مونيتورينگتەر جۇرگىزىپ، جەمقورلىقتىڭ سەبەپتەرى مەن شارتتارىن اشامىز. نەگىزگى ماقسات – قالىپتاسقان جەمقورلىق سحەمالارعا كەيىننەن باسقا شەنەۋنىك كەلىپ وتىرماۋى ءۇشىن بار سحەمالاردى اشۋ. ياعني، ەگەر ءبىز قىلمىستى انىقتاساق، سوڭىنا دەيىن جەتۋىمىز كەرەك، نەگە جاسالعانىن ءبىلىپ، وسى سحەمالار بۇدان ءارى جۇمىس ىستەمەۋى ءۇشىن ءتيىستى شارالار قابىلداۋ كەرەك»، - دەپ اتاپ ءوتتى اسحات جۇماعالي.
2023 جىلدىڭ سوڭىندا اكادەميادا ىرىكتەۋدىڭ قۇجاتتاردى قابىلداۋ، اڭگىمەلەسۋدەن، اسكەري-دارىگەرلىك كوميسسيالاردان، پوليگرافولوگيالىق تەكسەرۋدەن ءوتۋ، ەمتيحان تاپسىرۋ كەزەڭدەرىنەن وتكەن 50 كۋرسانت وقيدى بارلىعى 546 ءوتىنىم بەرىلدى، ياعني 10 ادام ءبىر ورىنعا ۇمىتكەر بولدى. اعىمداعى جىلدىڭ 1 ساۋىرىنەن باستاپ كۋرسانتتار ءبىر ايلىق تاعىلىمدامادان ءوتۋ ءۇشىن اگەنتتىكتىڭ اۋماقتىق دەپارتامەنتتەرىنە جىبەرىلەدى.
پراكتيكالىق ساباقتار اياقتالعاننان كەيىن ولار اكادەميادا سوڭعى كۋرستان ءوتىپ، سودان كەيىن تۇراقتى قىزمەتكە جىبەرىلەدى. كەزدەسۋ قورىتىندىسى بويىنشا اسحات جۇماعالي تىڭداۋشىلارعا تابىس تىلەپ، حالىق پەن مەملەكەتتىڭ يگىلىگى ءۇشىن ادال جانە لايىقتى قىزمەت اتقارۋعا شاقىردى. ول ولاردىڭ ءارقايسىسىنىڭ جەمقورلىققا قارسى ءىس-قيمىل جونىندەگى ورتاق ىسكە قوساتىن ۇلەستەرىنىڭ ماڭىزدىلىعىن اتاپ ءوتتى.