مەملەكەت باسشىسىنىڭ جول سالاسىنداعى جەمقورلىقتى جويۋ جونىندەگى تاپسىرماسىن ورىنداۋ ماقساتىندا سىبايلاس جەمقورلىققا قارسى ءىس-قيمىل اگەنتتىگى مەن كولىك مينيسترلىگى بىرلەسىپ جول قۇرىلىسى سالاسىنداعى جەمقورلىق تاۋەكەلدەرىنە سىرتقى تالداۋ جۇرگىزەتىن بولادى6 دەپ حابارلايدى اlmaty-akshamy.kz.
سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اسحات جۇماعالي مەن كولىك ءمينيسترى مارات قارابايەۆ اعىمداعى جىلدىڭ 10 ماۋسىمىندا وتكەن بىرلەسكەن كەڭەستە تالداۋ بارىسىندا شەشىلۋى قاجەت وزەكتى ماسەلەلەر مەن مىندەتتەردى تالقىلادى.
سوڭعى 3،5 جىلدا سىبايلاس جەمقورلىققا قارسى قىزمەت 64 جەمقورلىق قۇقىق بۇزۋشىلىقتى تىركەپ، 70 ادامدى اشكەرەلەدى. بۇل ارەكەتتەردىڭ سالدارىنان مەملەكەتكە 8،8 ميلليارد تەڭگە زالال كەلتىرىلدى، ونىڭ ىشىندە 38 ادام سوتتالدى. نەگىزگى قىلمىستار پاراقورلىق، جىمقىرۋ جانە لاۋازىمدىق وكىلەتتىكتەردى تەرىس پايدالانۋ فاكتىلەرىمەن بايلانىستى.
اسحات ءجۇماعاليدىڭ ايتۋىنشا، "جول جۇمىستارى ساپاسىنىڭ تومەندىگى قۇرىلىستىڭ بارلىق كەزەڭدەرىندە، سونىڭ ىشىندە بيۋدجەتتىك جوسپارلاۋ، جوبالاۋ، سمەتالىق جوسپارلاۋ، جوبالىق-سمەتالىق قۇجاتتامانىڭ مەملەكەتتىك ساراپتاماسى، تەحنيكالىق قاداعالاۋ، قابىلداۋ جانە پايدالانۋدى باقىلاۋ كەزەڭدەرىندە جۇيەلى جەمقورلىق تاۋەكەلدەرىمەن بايلانىستى."
مەملەكەت باسشىسىنىڭ تاپسىرمالارى اياسىندا جول سالاسىنا بولىنگەن بارلىق قاراجاتتى جوسپارلاۋ جانە جۇمساۋ ۇدەرىستەرى مۇقيات زەردەلەنەتىن بولادى. سونداي-اق، جول قۇرىلىسىنىڭ حالىقارالىق تاجىريبەسى، اتاپ ايتقاندا، گونكونگ، سينگاپۋر جانە جۇڭگو ەلدەرىنىڭ تاجىريبەسى تالدانادى. تالداۋ ناتيجەلەرى بويىنشا جول قۇرىلىسىنىڭ بارلىق كەزەڭدەرىندە جەمقورلىق تاۋەكەلدەرىن جويۋ جانە الدىن الۋ شارالارى قابىلدانادى. عىلىمي قاۋىمداستىقپەن بىرلەسىپ قۇرىلىستىڭ جاڭا تەحنولوگيالارىن ەنگىزۋ تەتىكتەرى ازىرلەنىپ، ۇسىنىلاتىن بولادى.
كەزدەسۋ قورىتىندىسى بويىنشا تاراپتار جول قۇرىلىسى سالاسىنداعى جاعدايدى جاقسارتۋ بويىنشا كەشەندى شارالاردى بەلگىلەدى.