قوپارىلعان جولدىڭ ۆيدەوسى الەۋمەتتىك جەلىگە جاريالانعان ەدى.
سىبايلاس جەمقورلىققا قارسى ءىس-قيمىل اگەنتتىگىنىڭ الماتى وبلىسى بويىنشا دەپارتامەنت وكىلدەرى الماتى-قورعاس تراسساسىندا قوپارىلعان جولدى تەكسەرۋگە ارنايى باردى، دەپ حابارلايدى Almaty-akshamy.kz
«الماتى-قورعاس تاسجولىنىڭ 190-شى شاقىرىمىنداعى جولدىڭ كوتەرىلۋىنە بايلانىستى ارنايى كەلدىك. ءقازىر جوندەۋ جۇمىستارىن جۇرگىزىپ جاتىر. بۇل جول 2017 جىلى تاپسىرىلعان. ءبىز جولدىڭ جوبالىق-سمەتالىق قۇجاتتارىن تولىقتاي تەكسەرەمىز»، - دەدى سىبايلاس جەمقورلىققا قارسى ءىس-قيمىل اگەنتتىگىنىڭ الماتى وبلىسى بويىنشا دەپارتامەنت باسشىسىنىڭ ءبىرىنشى ورىنباسارى نۇرسۇلتان بەكەنوۆ.
دەپارتامەنت باسشىسى ءبىرىنشى ورىنباسارىنىڭ ايتۋىنشا، جولداعى بەتونداردى بايلانىستىراتىن بىرىكتىرگىشتەردىڭ اراقاشىقتىعى تىم الشاق.
«الماتى وبلىسىنان باسقا دا اۋا رايى ىستىق ەلدەر بار. قاراپايىم مىسال رەتىندە دۋبايدى الايىق. ونداعى جولداردا مۇنداي پروبلەما جوق. مۇندا بەتون بىرىكتىرگىشتەر 500-600 مەتر سايىن سالىنىپ وتىرعان. الايدا، ول جەتكىلىكسىز. مىسالى، جاڭاعى دۋبايدى الاتىن بولساق، ونداعى اراقاشىقتىق - 80-100 مەتردەن. سوندىقتان، قىسىم بولعاندىقتان اۋا رايىنىڭ كۇرت ىسۋىنا بايلانىستى بەتون قوزعالىپ جاتىر. ءقازىر مۇنداعى جاعدايدى قازاۆتوجول وكىلدەرى وسىلاي دەپ ءتۇسىندىرىپ وتىر»، - دەيدى نۇرسۇلتان بەكەنوۆ.