قازاق ەلىنىڭ كۇمىس كومەي ءانشىسى، ق ر ەڭبەك سىڭىرگەن قايراتكەرى دۇنيەدەن وزدى، - دەپ حابارلايدى Aqshamnews.kz
سۋىت حاباردى دۇنيەجۇزى قازاقتارىنىڭ قاۋىمداستىعى جەتكىزدى.
گۇلزيرا بوكەيحان 1969 جىلى جۇڭگو حالىق رەسپۋبليكاسىنىڭ شىنجاڭ ولكەسىندە دۇنيەگە كەلگەن.
ونەرگە بالا كۇنىنەن قۇشتار بولعان ول كاسىبي جولىن ەرتە باستادى. 1983 جىلى ىلە وبلىستىق ونەر كوللەدجىنە وقۋعا ءتۇسىپ، 1986 جىلى اتالعان ءبىلىم ورداسىن ءتامامدادى. العاشقى ەڭبەك جولىن ىلە وبلىستىق قازاق ءان-بي تەاترىندا باستادى.
كەيىن ءبىلىمىن تەرەڭدەتۋ ماقساتىندا 1988–1993 جىلدارى بەيجىڭ ۇلتتىق ۋنيۆەرسيتەتىنىڭ مۋزىكا فاكۋلتەتىندە ۆوكال ماماندىعى بويىنشا باكالاۆر دارەجەسىن الدى.
1999 جىلى تاريحي وتانىنا ورالىپ، قۇرمانعازى اتىنداعى قازاق ۇلتتىق كونسەرۆاتورياسىنىڭ اسپيرانتۋراسىنا قابىلداندى. مۇندا ول كسرو حالىق ءارتىسى روزا جامانوۆانىڭ جەتەكشىلىگىمەن ءبىلىم الىپ، 2001 جىلى وقۋىن ءساتتى اياقتادى. وسىدان كەيىن ونەر يەسى استانا قالاسىنا جۇمىسقا شاقىرىلدى.
1999 جىلى قۇرمانعازى اتىنداعى قازاق ۇلتتىق كونسەرۆاتورياسىن بىتىرگەن.
استانا مەملەكەتتىك فيلارمونياسىندا جانە پرەزيدەنتتىك مادەنيەت ورتالىعىندا ءانشى بولعان.
ەرەكشە ەڭبەگى
ايتا كەتەرلىگى، گۇلزيرا بوكەيحان تاريحي وتانىنا ورالعاننان كەيىن التاي–تارباعاتاي وڭىرىندە ساقتالعان كونە حالىق اندەرىن جاڭعىرتۋعا ايرىقشا ۇلەس قوستى. قازىرگى تاڭدا ساناۋلى كاسىبي ماماندار عانا ورىنداي الاتىن بۇل سيرەك مۇرالاردى زاماناۋي وڭدەۋدەن وتكىزىپ، قۇرمانعازى اتىنداعى ۇلتتىق اسپاپتار وركەسترى مەن نۇرعيسا تىلەندييەۆ اتىنداعى قازاق ەتنوگرافيالىق وركەسترىنىڭ ورىنداۋىندا ساحناعا شىعاردى.
ونەر يەسى وسى باعىتتاعى كونسەرتتىك باعدارلامالار ارقىلى ۇلتتىق مۋزىكالىق قازىنانى كەڭ اۋديتورياعا ۇسىنىپ، بۇقارالىق اقپارات قۇرالدارى ارقىلى حالىق اراسىندا كەڭىنەن ناسيحاتتادى.