«اننا كارەنينا» رومانى قازاق تىلىنە اۋدارىلدى.
شىعارمانى بەلگىلى اۋدارماشى عالي ورمانوۆ وزىندىك ءستيلىن ساقتاي وتىرىپ ءتارجىمالاعان. ليەۆ تولستوي شىعارماسىنىڭ قازاق تىلىندەگى نۇسقاسى «مازمۇنداما» باسپاسىندا جارىق كوردى، دەپ حابارلايدى Almaty-akshamy.kz.
الماتىداعى ۇلتتىق كىتاپحانادا سول ەڭبەكتىڭ تۇساۋكەسەرى ءوتتى. اتالمىش باستاما بەلگىلى اۋدارماشىنىڭ 115 جىلدىعىنا وراي ءوتتى. «اننا كارەنينا» - الەمدە كەڭ تارالعان ماحاببات تۋرالى رومان. ءىس-شارا اياسىندا عالي ورمانوۆتىڭ شىعارماشىلىعى مەن ومىرىنەن سىر شەرتەتىن «سىرلى سەزىم اقىنى» اتتى كورمە ۇيىمداستىرىلدى.
«قازىرگى ءبىزدىڭ جاستاردىڭ كىتاپ وقۋعا دەگەن جاقسى ىنتاسى ارتىپ كەلە جاتىر. ونى مويىنداۋىمىز كەرەك. سونىڭ ارقاسىندا ءقازىر سول كىتاپتىڭ قوسىمشا تيراجبەن تاپسىرىس بەرىلىپ، قازىرگى تاڭدا 2000 تيراجعا شىعىپ جاتىر. باسىندا تەك 500 جوسپارلانعان. ەندى سۇرانىس كوپ بولعاندىقتان، جالپى كىتاپتىڭ تيراجىن 2000-عا جەتكىزىپ وتىر»، - دەدى عالي ورمانوۆتىڭ نەمەرەسى ايدار قىرىقباي ۇلى.